هەپەگە، ئەمڕۆ چوارشەممە، ئاشكرایكرد، لە دو چالاكی گەریلادا لە ناوچەكانی مەتیناو هەفتانین لە باشوری كوردستان، ئەوەی رونبۆتەوە سێ سەربازی سوپای توركیا كوژراون.
ئاوێنە: ناوەندی راگەیاندنی هێزەکانی پاراستنی گەل(هەپەگە)، لە راگەیەندراوێكدا ئاشكرایكرد، رۆژی 1ی ئاب، گەریلاكانیان لە شاخی كۆخەی مەلا یەحیا لە ناوچەی هەفتانین، ئۆتۆمبێلیكی سوپای توركیایان كردۆتەوە ئامانج و لە ئاكامدا دو سەربازی توركیا كوژراون و گورزیش لە ئۆتۆمبێلەكە دراوە.
لە بەشێكی دیكەی راگەیەندراوەكەدا هاتوە رۆژی 3ی ئاب لە شاخی ئازادی سەربە زەندورا لە ناوچەی مەتینا، هێزەكانیان سەنگەرێكی سوپای توركیایان كردۆتە ئامانج و لە ئاكامدا سەربازی توركیا كوژراوەو یەكێكی دیكەش برینداربوە.