وەزارەتی خوێندنی باڵاو توێژینەوەی زانستی حكومەتی هەرێم رایگەیاند، ئەمڕۆ دوشەممە، بەسەرپەرشتى و ئامادەبونى ئارام محەمەد قادر، وەزیرى خوێندنى باڵا، ئاڵوگۆڕى پۆستى هەریەک لە سەرۆک زانکۆکانى (دهۆک، پۆلیتەکنیکى دهۆک، زاخۆ)، لە سێ ڕێوڕەسمى جیادا لە دهۆک و زاخۆ بەڕێوەچو.
ئاوێنە: بەپێی راگەیەندراوێكی وەزارەتەكە، هەریەک لە (د. داود سلێمان ئەتروشى) لە جێگەى (د. موسڵح دهۆکى) وەک سەرۆکى زانکۆى دهۆک و (دکتۆرە ئارى عادل عبدالقادر) لەجێگەى (د. عەدنان موحسین) وەک سەرۆکى زانکۆى پۆلیتەکنیکى دهۆک و (د. ناظم سلێمان عبدالعزیز) لەجێگەى (د. لەزگین عەبدى) وەک سەرۆکى زانکۆى زاخۆ، دەستبەکاربون و ئاڵوگۆڕى پۆستەکانیان لەگەڵ یەکتر ئەنجامدا.
لە ڕێورەسمى ئاڵوگۆڕى پۆستەکاندا، د. ئارام محەمەد قادر، وەزیرى خوێندنى باڵا و توێژینەوەى زانستى رایگەیاند: ئامادەکارییەکانمان بۆ پێشوازیکردن لە ساڵى نوێى خوێندن دەستپێکردوەو پرۆسەى خوێندن لە زانکۆ و پەیمانگەکانى هەرێمى کوردستان لە ١/٩ بەدواوە بەپێى ساڵنامەى زانکۆیی بە پلان و کارنامەى تازە دەستپێدەکات، بۆ ئەمەش داواى لە ستافی زانکۆکان کرد هاوکارى سەرۆکى زانکۆکان بن لە داڕشتنەوەى روئیاو پلانى زانکۆکانیان.