فازڵ نەبی، بریكاری پێشوی وەزارەتی دارایی عێراق كۆبونەوەكەی دوێنێی نێوان وەزیری نەوتی عێراق و وەزیری سامانە سروشتییەكانی هەرێم بە "زۆر گرنگ" ناودەبات و دەشڵێت: ئەو کۆبونەوەیە دەرفەتێکی باشە بۆ چارەسەرکردنی کێشەکان و رێککەوتنیش لە نێوان ھەردولا ھەیە لەبارەی نەوت و تەنھا لەسەر داھاتە سیادییەکان ھەندێک کێشە هەیە.

ئاوێنە: فازڵ نەبی، ئەمڕۆ دوشەممە، بە ماڵپەڕی رەسمی پارتی وتوە "کۆبونەوەی ھەردو وەزیری سامانە سروشتییەکان و وەزیری نەوتی عێراق گرنگیی زۆری ھەیەو دەبێتە ھۆی ئەوەی کە بەشێک لە کێشەکان چارەسەر بکرێن، چونکە کۆمەڵێک کێشە لە نێوان ھەرێم و بەغدا ھەیە، بەتایبەت کێشەی دارایی، بۆیە گرنگە سەرجەم کێشەکان چارەسەر بکرێن.''

فازڵ نەبی وتیشی"داھاتی سەرەکیی ھەرێم و بەغدا داھاتی نەوتە، بۆیە ئەگەر لەسەر نەوت بگەنە رێککەوتن و ھەماھەنگی ھەبێت کێشەکان زوتر چارەسەر دەکرێن، ئەو کۆبونەوەیە دەرفەتێکی باشە بۆ چارەسەرکردنی کێشەکان و ڕێککەوتنیش لە نێوان ھەردولا ھەیە لەبارەی نەوت و تەنھا لەسەر داھاتە سیادییەکان ھەندێک کێشە هەیە."

فازڵ نەبی باسی لەوەش کرد"ئەگەر پەیوەندیی ھەرێم و بەغدا باش بێت، وڵاتانیش زیاتر دان بە نەوتی ھەرێمدا دەنێن و کۆمپانیای زیاتر دێنە ھەرێمی کوردستان و ڕێککەوتن لە نێوان ھەرێم و بەغدا لەبارەی نەوتەوە زۆر گرنگ و ئیجابییە و پێویستە ڕێککەوتن لە ھەمو بوارەکاندا ھەبێت، بەتایبەت لە بواری نەوت."

وتیشی"ئەو کەشە خۆشەی لە نێوان ھەرێم و بەغدا ھەیە، زیاتر کۆمپانیاکان ھان دەدات بێنە ھەرێمی کوردستان و لە بواری نەوت کاری وەبەرھێنان بکەن، بۆیە ھیوادارین پەیوەندییەکان بەردەوام بن و ھەرچیی کێشە ھەیە چارەسەری بکەن.''