میدیاى سوریی هێرشده‌كاته‌سه‌ر هاوپه‌یمانى نێوده‌وڵه‌تى دژى داعش‌و تۆمه‌تبارى ده‌كات به‌بردنى نه‌وتى ڕۆژئاواى كوردستان‌و سوریاو فرۆشتنه‌وه‌ى به‌هه‌رێمى كوردستان، له‌به‌رامبه‌ریشدا وتەبێژێك بەناوی ژوری ئۆپەراسیۆنی "ئیرادەی پۆڵاین" ڕونكردنه‌وه‌یه‌كى به‌په‌له‌ بڵاوده‌كاته‌وه‌.

ئاوێنە: ئاژانسەکانی هەواڵی سەر بەڕژێمی سوریا هەواڵی ئەوەیان بڵاوکردەوە، گوایه‌ هێزەکانی ئه‌مریكا لەڕێگای دەروازەی سنوریی (وەلید)ەوە، دەیان تانکەر نەوت‌و بارهەڵگری پڕ لەدانەوێڵەیان لەناوچەکانی ڕۆژئاوای کوردستانەوە ڕەوانەی هەرێمی کوردستان کردوە.

عەقید واین مارۆتۆ وتەبێژ بەناوی ژوری ئۆپەراسیۆنی "ئیرادەی پۆڵاین" لەتویتێکدا لەهەژماری خۆی نوسیویه‌تى:"کاروانە بارهەڵگرە مەدەنییەکان بەشێوەیەکی ڕۆتینی کەلوپەل‌و پێداویستیی لەعێراقەوە بەرەو باکوری سوریا (ڕۆژئاوای کوردستان) دەگوازنەوە، بۆیە ئەو هەواڵانەی کە باس لەبردنی نەوت‌و زەیت‌و گەنمی ناوچەکانی باکورو ڕۆژهەڵاتی سوریا لەلایەن ئه‌مریكاوە دەکەن دورن لەڕاستییەوە".

مارۆتۆ لەبەشێکی تری تویتەکەیدا دەڵێت:"ئەرکی هاوپەیمانی نێودەوڵەتیی دژ بەداعش لەباکورو ڕۆژهەڵاتی سوریا بریتییە لەهاوکاریکردنی هێزەکانی سوریای دیموکرات (هەسەدە) لەجەنگی دژ بەداعش‌و پاشماوەکانی ئەو ڕێکخراوە، بۆئەوەش پشت بەبڕیاری ژمارە 2254ى ساڵی 2015ی ئەنجومەنی ئاسایش دەبەستێت.