2021-08-12 1440
بەرپرسێکی باڵای سەربازیی عێراق ئاشکرایدەکات، هەرێمی کوردستان داوای گەرەنتی ئەمنی کردوە بۆ دوای کشانەوەی سوپای ئەمریکا لەعێراق‌و هەرێمی کوردستان.
ڕۆژنامەی عربی جدید-ی قەتەری لەژمارەی ئەمڕۆیدا بابەتێکی لەبارەی کشانەوەی ئەمریکا لەهەرێمی کوردستان بڵاوکردۆته‌وه‌و ڕایگەیاندوه، "هەرێمی کوردستان هەردوو لایەنی عێراقیی‌و ئەمریکی ئاگادارکردوەتەوە، کە گەرەنتی ئەمنی بدرێتە هەولێر بەر لەکشانەوەی ئەمریکا".
هەر بەگوێرەی ڕۆژنامە قەتەریەکە، "هەرێم داوایکردوە سنورەکانی بپارێزرێت، هەروەها میلیشیاکانی حەشدی شەعبی لەنزیک هەرێم دوربخرێنەوە".
بەشێک لەچاودێرانی سیاسی پێشبینییان کردوە، کشانەوەی ئەمریکا کاریگەریی لەسەر بنکەی سەربازیی هەریر نەبێت، ئەمریکا بۆ پاڵپشتی هێزەکانی سوریای دیموکرات (هەسەدە) ئەو بنکە سەربازییە لەهەولێر بهێڵێتەوە، بەڵام هەرێمی کوردستان بێهیوا بوە لەمانەوەی ئەمریکا لەعێراق.