جێگری سەرۆكی لیژنەی سامانە سرووشتییەكان لە پەرلەمانی كوردستان ئاشكرایكرد، وەزارەتی سامانە سروشتیەكان و پەرلەمان و نوێنەری پارێزگاكان لەسەر كەمكردنەوەی نرخی بەنزین كۆدەبنەوە و دوو رێگاش هەن بۆ ئەو مەبەستە.
ئاوێنه: گولیزار رەشید سندی پەرلەمانتاری پارتی و جێگری سەرۆكی لیژنەی سامانە سرووشتییەكان لە پەرلەمانی كوردستان بە ماڵپەڕی حزبەكەی وتووە، چاوەڕێ دەكەین ژورێك بۆ تاووتوێ كردنی نرخی بەنزین و كەمكردنەوەی نرخەكەی دروست بكرێت، نوێنەری وەزارەت و پەرلەمان و هەر سێ پارێزگاكە كۆبوونەوەیەك ئەنجام دەدەن، لەبارەی هۆكاری گران بوونی نرخی بەنزین كە ئێستا جارێكی دیكە نرخەكە بەرزبۆتەوە.
رونیشیكردووەتەوە، بەنزین كە لە ئێران دێت گران بووە و تا دەگاتە هەرێمیش نرخەكە گرانتر دەبێت، هۆكارێكی دیكە ئەوەیە كواڵێتی بەنزین خراپ بووە بۆیە وەزارەت هەندێك مەرجی بۆ هاوردەكردنی بەنزین دانابوو، ئەمەش وایكرد هەموو كۆمپانیایەك نەیتوانی بەنزین هاوردە بكات باجیش زیاتر بوو، ئەمە بووە گرفتێك و ئێستا كار دەكرێت بۆ ئەوەی باج كەمبكرێتەوە و نرخی بەنزین كەمبێتەوە.
جێگری سەرۆكی لیژنەی سامانە سرووشتییەكان وتوشیەتی، لە پاڵاوگەیەكی نێوخۆیی كە بەنزین بەرهەم دێت بۆ هەر پارێزگایەك حكومەت دەیداتە كۆمەڵێك بەنزینخانە، داوامان كرد هەر جارە و بدرێتە كۆمەڵێك بەنزینخانە نەك تەنیا بدرێت بە كۆمەڵێكی دیاریكراو، بۆ ئەوەی هەمووان لێی سودمەندبن چونكە ئەوان نرخی بەنزین بە 660 دینار دەفرۆشن، بڕیارە بەم دوو رێگایە كێشەی گرانبوونی نرخی بەنزین هەرزان بكرێت.