کۆمەڵەی کێڵگە پەلەوەرییەکان بۆ جارێکی دیکە زەنگی داڕوخانی کەرتی پەلەوەر لە هەرێمی کوردستان لێ دەدات و رایدەگەیەنێت، خاوەن پڕۆژەکان بەرەو مایەپوچبون دەڕۆن.

ئاوێنە، زریان محەمەد: نازم عەبدوڵا جاف، سەرۆکی کۆمەڵەی کێڵگە پەلەوەرییەکان بە ئاوێنەی راگەیاند" کەرتی پەلەوەر لەئێستادا بەتەواوی مەترسی هەرەسهێنانی لەسەرە، هیچ لایەنێک خۆی ناکات بەخاوەنی ئەم کەرتە، پشتیوانی تەواومان ناکەن بۆ مانەوەو لەسەر پێوەستانی خۆی کە دەرفەتی کاری بۆ هەزاران خێزان رەخساندوە."

راشیگەیاند"لەئێستادا بەردەوام نرخی عەلەف لەسەر خاوەن پرۆژەکان بەرزدەبێتەوە بەبێ ئەوەی چاودێری لەسەر کارگەکانی دروستکردنی عەلەف هەبێت، لەماوەی چەند مانگێكدا نرخی هەر یەک تۆن عەلەف لە ٤٥٠ دۆلارەوە بۆ ٥٥٠ دۆلار بەرز بۆتەوە، نرخی هەر یەک جوچک لە ٣٠ سەنتەوە بۆ ٨٥ سەنت بەرز بۆتەوە، پێشبینی دەکرێت نرخی جوچک بگاتە ١ دۆلار کە ئەمەش نرخێکی بەرزە بۆ خاوەن پرۆژەکان و تێچوی زۆر دەبێت."

ئاماژەی بەوەشدا لەکاتێکدا مریشک دەچێتە بازاڕەوە کە نرخی ٢٠٠ دینار زیاد دەبێت هەمولایەک نیگەرانیان دەگەیەنن پێمان و ڕێگری لێ دەکرێت بچێتە دەرەوە، ئێمە ماوەی سێ ساڵە داوا لەحکومەت دەکەین نرخ بۆ پەلەوەر دیاریبکات و بەشێوەی سیستماتیک ئەم کەرتە لە هەرەسهێنان و داڕوخان بوەستێنێت.

سەرۆکی کۆمەڵەی کێڵگە پەلەوەرییەکان جەخت لەوە دەکاتەوە"لەئێستادا بەهۆی چەندین نەخۆشییەوە رۆژانە لەناو هۆڵەکانی بەخێوکردنی پەلەوەردا بە سەدان جوچک و مریشک مردار دەبنەوەو زیانی زۆر بە خاوەن کێڵگەکان دەگەیەنێت، لەئێستادا خاوەن کێڵگە پەلەوەرییەکان ترسیان لەوە هەیە جارێکی تر هۆڵەکانیان پڕکەنەوە لە جوچک بەهۆی گرانی عەلەف و جوچک ئەمەش وادەکات كەرتەکەمان بەتەواوی ئیفلیج ببێت."

نازم جاف، دەشڵێت"بەوپەڕی توانامانەوە ئەم کەرتەمان لەسەر پێ هێشتۆتوە، نەمان هێشتوە تائێستا بکەوێت و بەردەوام دەستمان ناوە بەڕوی هەمو وەزارەت و کەسایەتی و لایەنە پەیوەندیدارەکان هەوڵەکانیان بخەنەگەڕ بۆ هێشتنەوەی ئەم کەرتەو پشتیوانی کردنمان بەڵام هەوڵەکانی ئەوان وەک پێویست نییە."

لەسنوری پارێزگای سلێمانی و هەڵەبجەو گەرمیان ٩٠٠ پرۆژەی بەرهەمهێنانی مریشک هەیە کە خۆی لە ١٣٠٠ هۆڵ دەبینێتەوە بێجگە لەپڕۆژەی نایاسایی.