میدیا عێراقییەكان، ئێوارەی ئەمڕۆ دوشەممە، بڵاویان كردەوە، ئەنوەر حەمە ئەمین، فەرماندەی پێشوی هێزە ئاسمانییەكانی عێراق، دەستگیركرا، ناوبراو هەر ئەمڕۆ لەدوای ئەوەی لەلایەن دادگاوە سزای دو ساڵ زیندانی بۆ دەرچو لە بەغدا هەڵهاتبو.
ئاوێنە: ماڵپەڕی سومەریە نیور، لەزاری سەرچاوەیەكی ئەمنییەوە بڵاویكردۆتەوە، ئەنوەر حەمە ئەمین، فەرماندەی هێزە ئاسمانییەكانی عێراق، دوای هەڵهاتنی لەلایەن هێزە ئەمنییەكانەوە دەستگیركراو ئێستا لە بنكەی پۆلیسی "ساڵحیە"یە.
ئەنوەر حەمە ئەمین، ئەمڕۆ دوای ئەوەی برایە بەردەم دادگای تاوانەكانی كەرخ لە بەغدا، لەلایەن دادگاوە سزای دو ساڵ زیندانی بۆ دەركرا، بەڵام لەكاتی هاتنە دەرەوەیدا لە دادگا، بە هاوكاری برازایەكی كە عەقیدە لە وەزارەتی بەرگری، لە دەستی پۆلیس هەڵهات بۆ شوێنێكی نادیار، بەرلەوە برازاكەی دەستگیركرابو.