پۆلیسی سلێمانی رایگەیاند، ئەو تۆمەتبارەیان دەستگیركردوە كە لە ناو یانەیەكی شەوانەدا لە گەڕەكی سەرچنار لە كەسێك دەدات. ڤیدیۆی روداوەكە لە تۆڕە كۆمەڵایەتییەكان بڵاوكراوەتەوەو پۆلیس دەڵێت: مێژوی روداوەكە بۆ مانگی 12ی ساڵی رابردو دەگەڕێتەوە.

ئاوێنە: بەڕێوەبەرایەتی پۆلیسی پارێزگای سلێمانی، ئێوارەی ئەمڕۆ پێنجشەممە، لە راگەیەندراوێكدا وتی"مەفرەزەكانی بەشی پۆلیسی ناوشار ڕۆژئاوا -بنكەی پۆلیسی سەرچنار تۆمەتبارێكیان دەستگیركرد كە لەناو یانەیەكی شەوانەدا لەگەڕەكی سەرچنار هێرشیكردبوە سەر هاوڵاتییەك."

ئەوەشی خستۆتەڕو"دوای ئەوەی لەتۆڕەكۆمەڵایەتییەكان گرتە ڤیدیۆیەك لەناو یانەیەكی شەوانە بڵاوبۆوە كە مێژوەكەی دەگەڕێتەوە بۆ مانگی 12ی ساڵی 2020 كە وا تۆمەتبارێك هێرش دەكاتە سەر هاوڵاتییەك، بەڕێز بەڕێوەبەری پۆلیسی پارێزگای سلێمانی بەشی پۆلیسی ناوشار-ڕۆژئاوای ڕاسپارد كە هەستن بەدۆزینەوەی تۆمەتبارو ئەو هاوڵاتییەی كە هێرشیكراوەتە سەری."

هەروەها ئاماژەی بەوەشداوە كە "دوای لێكۆڵینەوەكان توانرا هاوڵاتییەكە بدۆزرێتەوەو سكاڵا تۆمار بكات و لەماوەیەكی كەمیشداو لەلایەن بنكەی پۆلیسی سەرچنارەوە تۆمەتبار دەستگیركرا."

جەختیشی كردۆتەوە كە "لەئێستادا تۆمەتبار (م ، ف ، ع ) لەدایكبوی 1993 بەناسنامە ئێرانی/ دانیشتوی شاری سلێمانی، بەبڕیاری بەڕێز دادوەر بەندە."