2021-08-22   554     
بەگوێرەی سەرچاوە كەشناسییەكان، یەكەم شەپۆڵی بارانبارینی ئەمساڵ دەركەوت كە لە ڕۆژانی (5 و 6) ی مانگی داهاتوودا دەبارێت و كۆتایی بە گەرمای هاوینی ئەمساڵ دەهێنێت.
ئاوێنە: لە ڕاگەیەنراوێكدا (ئاراس جەبار) شارەزای كەشناسی ڕایگەیاند، بەپێی پێشبینی مۆدێلە ئەمریكیەكان و دوای پێداچوونەوەمان بۆ زانیارییەكان دەركەوتووە لەسەرەتای مانگی داهاتوودا بەتایبەت لە رۆژانی (5 و 6) ی مانگەكەدا چاوەروان دەكرێت بارستە هەوایەكی سارد داببەزێتە سەر حەوزی دەریای ناوەراست و نزمە پاڵەپەستۆیەكی باران پێكبهێنێت بە ئاڕاستەی ناوچەكانمانەوە.
ئاماژەی بەوەشكردووە، دەتوانین بڵێین ئەوە یەكەم شەپۆڵی بارانبارین دەبێت لە ئەمساڵدا و بەیەكجاری كۆتایی بەگەرما دەهێنێت لەناوچەكەدا.
ئەوە كەشناسە ئەوەشی خستۆتەڕوو، لەئێستاوە نزمە پاڵەپەستۆی بارانبارین دەركەوتووە هاوشێوەی ئەوەی لە ساڵی (2015) ڕوویدا بەهەمان شێوە شەپۆڵێكی بارانبارین رووی كردە ناوچەكە لەمەودای رۆژانی (5 بۆ 7) ی مانگی (9) ی ئەو ساڵەدا بارانێكی زۆر باش هەندێ ناوچەی گرتەوەو پلەكانی گەرما بەرادەیەكی بەرچاو نزمبوونەوە، بەڵام ئەمە ئەوە ناگەیەنێت كە بڵێین وەك ساڵی (2015) بارانبارین زۆر دەبێت یان هاوشێوەی ئەو ساڵە دەبێت.
بەوتەی (ئاراس جەبار) بەگشتی ئەو شەپۆڵە گەرمایەی لە دوو رۆژی داهاتوودا ناوچەكە دەگرێتەوە كۆتا شەپۆڵی گەرمادەبێت و تا كۆتایی مانگ بەردەوامی دەبێت بە هاتنی ئەم شەپۆڵە بارانبارینە كۆتاییش بە گەرمای هاوینی ئەمساڵ دێت.