قوباد تاڵەبانی، جێگری سەرۆك وەزیرانی هەرێمی كوردستان، ئەمڕۆ دوشەممە، سەرپەرشتی كۆبونەوەیەكی هاوبەشی وەزارەتە پەیوەندیدارەكانی پەیوەست بە وزە كرد و لەبارەی چۆنییەتی چارەسەركردنی گرفتە‌كان گفتوگۆ كرا.

ئاوێنە: بەپێی راگەیەندراوێكی حكومەتی هەرێمی كوردستان، لە كۆبونەوەكەدا بەئامادەبونی وەزیری كارەبا، سە‌رۆكی دیوانی ئە‌نجومە‌نی وە‌زیران، سە‌رۆكی فە‌رمانگە‌ی ھە‌ماھە‌نگی بە‌دواداچون و بریكاری وەزارەتی سامانە‌ سروشتییە‌كان، قوباد تاڵە‌بانی سەرنجەكانی خۆی خستەڕو لەبارەی ئەنجامی بەسەركردنەوەی فەرمانگەی كارەبای سلێمانی و باسی لەوەكرد خەڵك بەرچاویان ڕون نییە لەبارەی قەرزەكان و وردەكارییەكانی پێوەری زیرەك و میكانیزمەكانی كاركردنیش لە ئاست چاوەڕوانییەكاندا نین و پێویستە چاكتر بكرێن.

لەمبارەیەشەوە بڕیاردرا دەوامی وەزارەتی كارەبا ڕێكبخرێتەوە بەتایبەت فەرمانبەرانی دابەشكردنی پسولە.

لە كۆبونەوەكەدا جەخت لەوەكرایەوە وەزارەتی كارەبا هەمو توانایەك بخاتەگەڕ بۆ زیادكردنی ئاستی پێدانی وزەی كارەبا بە هاوڵاتیان و باشتركردنی رێوشوێنەكانی بژاردنی قەرزەكانی هاوڵاتیان بەجۆرێك بێت بتوانن بیگێڕنەوەو لۆدی زۆری سەر فەرمانگەكانی كارەبا دابەش بكرێت و كەم بكرێتەوە.

لەبارەی نرخی بەنزینەوە گفتوگۆ لەبارەی هۆكارەكانی بەرزبونەوەی نرخەكەی كرا كە كەمبونەوەی هاوردەیە بەتایبەت هەرێمی كوردستان ڕۆژانە پێویستی بە شەش ملیۆن و نیو لیتر هەیە، جگە لەمەش نرخەكەی لەسەر ئاستی جیهان بەرز بوەتەوە.

لەمبارەیەشەوە وزارەتی سامانە سروشتییەكان ڕاسپێردرا بەرچاوڕونی زیاتر بداتە سەرۆكایەتی ئەنجومەنی وەزیران.