وەزارەتی بەرگری ئەمریكا(پەنتاگۆن)، ئاشكرایكرد، لە تەقینەوەكانی ئەمڕۆ(پێنجشەممە)ی فڕۆكەخانەی كابوڵدا، ژمارەیەك سەربازی ئەمریكی كوژراون و ژمارەیەكی دیكەش برینداربون.
ئاوێنە: جۆن كیربی، وتەبێژی وەزارەتی بەرگری ئەمریكا لە بەیاننامەیەكدا وتی، ژمارەیەك سەربازی ئەمریكی لە "هێرشە ئاڵۆزەكە"ی ئەمڕۆی فڕۆكەخانەی كابوڵدا كوژراون و ژمارەیەك سەربازی دیكەی ئەمریكیش بەهۆی برینداربونەوە لەژێر چارەسەردان.
لەلایەكی دیكەوە رۆژنامەی "ۆڵ ستریت جۆرناڵ" بڵاویكردەوە، ژمارەی ئەو سەربازە ئەمریكییانە لە دو تەقینەوەكەدا كوژراون چوار سەربازەو ژمارەیەكی دیكەش برینداربون.
رۆژنامەكە لەزاری بەرپرسێكی ئەمریكییەوە بڵاویكردۆتەوە كە، باڵیۆزی ئەمریكا لە كابوڵ بە كارمەندانی باڵیۆزخانەكەی وتوە، چوار سەربازی ئەمریكی لە تەقینەوەكاندا كوژراون و سێ سەربازی دیكەش برینداربون.
ئەمڕۆ پێنجشممە، دو تەقینەوە لە نزیك فڕۆكەخانەی كابوڵی پایتەختی ئەفغانستان رویانداوە بەپێی قسەی سەرچاوە ئەمنییەكانی ئەو وڵاتە ژمارەیەكی زۆر قوربانی لە تەقینەوەكان كەوتۆتەوە.