وەزارەتی بەرگری ئەمریكا(پەنتاگۆن) رایگەیاند، لە هێرشێكدا بە فڕۆكەی بێفڕۆكەوان، یەكێك لە پلانداڕێژەرانی تەقینەوە خۆكوژییەكانی فڕۆكەخانەی كابوڵیان لە رۆژهەڵاتی ئەفغانستان كوشتوە كە سەربە ویلایەتی خۆراسانی رێكخراوی داعش بوە.

ئاوێنە: بەپێی قسەی وەزارەتی بەرگری ئەمریكا، هێرشەكە لە ویلایەتی نەنگەرهاری ئەفغانستان ئەنجامدراوەو بەگوێرەی زانیارییەكان لە هێرشەكەدا هیچ هاوڵاتییەكی مەدەنی بەرنەكەوتوە.
ئەو هێرشەی ئەمریكا رۆژێك دوای تەقینەوە خوێناوییەكانی فڕۆكەخانەی كابوڵ هاتوە كە تێیدا لانیكەم 170 كەس كوژراون لەنێویاندا 13 سەربازی ئەمریكی.

ویلایەتی خۆراسانی رێكخراوی داعش ئەنجامدانی تەقینەوەكانی فڕۆكەخانەی كابوڵی لەئەستۆ گرتبو.

وەزارەتی بەرگری ئەمریكا ئاماژەی بەوەشداوە كە هێشتا پڕۆسەی گواستنەوەی ئەمریكییەكان و هاوكارە ئەفغانییەكانیان لە فڕۆكەخانەی كابوڵ، لەبەردەم مەترسیدایە.

هەروەها باڵیۆزخانەی ئەمریكا لە كابوڵ داوای لەو هاوڵاتییە ئەمریكییانە كردوە كە ەل ئێستادا لە دەروازەكانی "ئەبی گەیت" و رۆژهەڵات و باكوری فڕۆكەخانەی كابوڵن، دەستبەجێ ئەو شوێنانە جێبهێڵن.

جۆ بایدن رۆژی هەینی بەڵێنی دابو كە هێزەكانیان وەڵامیان بۆ تەقینەوەكانی فڕۆكەخانەی كابوڵ دەبێت و سزای ئەنجامدەرانی ئەو تەقینەوانە دەدەن.