ئا: ئاوێنە
ئەنجامی هەڵبژاردنەكانی پەرلەمانی ئەوروپا گۆڕانكارییەكی گەورەی لەپێكهاتەی فراكسیۆنەكاندا بەدیهێناوە، بۆ یەكەمجارە حیزبە سۆسیالیستو محافزەكارەكان زۆرینەی پەرلەمان پێكناهێننو حیزبە سەوزو پۆپۆلیستو راسیستە توندڕەوەكان براوەی سەرەكین.
پارلەمانی ئەوروپا کە بارەگاکەی لەبرۆکسلو ستراسبۆرگە، لە٧٥١ کورسی پێكدێت كە نوێنەرانی لە ٢٨ وڵاتی ئەندامی یەکێتییەكەوە بۆ ماوەی پێنج ساڵ هەڵدەبژێرێن.
هەر وڵاتەو بەپێی ژمارەی دانیشتوانیان نوێنەر دەنێرنە ناو پەرلەمانی ئەوروپاوە.
پەرلەمانی ئەوروپا بودجەی یەکێتی ئەوروپاو بەرپرسی کۆمیسیۆنی ئەوروپا دیاریدەكاو سیاسەتی یەكێتییەكە دادەڕێژێتو رۆڵی یەكلاكەرەوەی دەبێت لەدابەشكردنی پۆستەكاندا.
رێژەی بەشدار بون لەم هەڵبژاردنەدا لەهەمو هەڵبژاردنەكانی 40ی رابردوی پەرلەمانی ئەروپا زیاتر بو، كە زیاتر لە51% بەشدارییان كرد، پێنج ساڵ لەمەوبەر رێژەی بەشدار بون تەنها 42% بو.
شەپۆلی هێزە ناسیۆنالیستیو راسیستو راستە توندڕەوەكانو حیزبە سەوزەكان، باڵادەستی حیزبە محافزەكارو سۆشیال دیموكراتەكانی لەپەرلەمانی ئەوروپادا كۆتایپێهێنا.
ژمارەی كورسییەكانی فراکسیۆنی محافزەکار EPP لە ٢١٦ کورسییەوە دابەزی بۆ ١٨٠ كورسی.
ژمارەی كورسییەكانی فراكسیۆنی سۆشیال دیموکراتەکان S & Dلە 191 کورسییەوە دابەزی بۆ ١٥٢ کورسی.
چیتر حیزبە سۆشیالیستەکان و محافزەکارەكان وەک ٤٠ ساڵی رابردو زۆرینەی پەرلەمانی ئەوروپا پێكناهێنن، محافزەکارەكان ٢٥٪ دەنگەکانی بەدەستهێناو سۆسیال دیموکراتەکان ٢٠٪ی دەنگەکان.
گرنگترین روداوەكانی ئەم هەڵبژاردنە بریتی بون لە:
لەفەرەنسا حیزبی "یەكێتی میللی" راستی توندڕەوص راسیست، بەسەرۆكایەتی "مارین لۆپین" لەحزبەكەی ئیمانۆیل ماكرۆنی سەرۆكی فەرەنسای بردەوە كە حیزبی "كۆمار بۆ پێشەوە"یە، حزبەكەی لۆپین ٢٤٪ی دەنگەكانی بەدەستهێناو حیزبەكەی ماكرۆن ٢٢.٥٪.
لەبەریتانیا حزبی تازە دامەزراوی "برێكست" كە هەواداری چونە دەرەوەی بەریتانییە لەیەكێتی ئەوروپا سەركەوتنێكی گەورەی بەدەستهێناو ٣١٪ی دەنگەکانی بردەوە، دو پارتە دێرینەكەی بەریتانیا محافزەكارو كرێكاران پاشەكشەی گەورەیان كرد.
لەئیتالیا ماتیو سالڤینی، سەرکردەی حزبی راستڕەوی لیگ، لەنێو 11 حیزبدا توانی زۆرترین دەنگ بەدەستبهێنێت كە 32%ی دەنگی ئیتاڵییەكان بو.
لەئەڵمانیا حیزبی دیموکرات مەسیحیی "ئەنجێلا مێرکل" كە پێنج ساڵا لەمەوبەر ٣٥٪ی دەنگی ئەڵمانەكانی هێنابو لەم هەڵبژاردنەدا تەنها ٢٨٪ بەدەستهێنا، حزبی چەپی سۆشیال دیموکرات دەنگەكانی لە ٢٧٪ەوە دابەزی بۆ ١٥٪و حزبی ئەی ئێف دی راستڕەوی ئەڵمانیا ١٠.٥٪ دەنگەکانی بەدەستهێنا.
دو سەركردەی سەربەخۆخوازی كەتەلۆنیا لەئیسپانیا، كارلۆس پوجدمونو كە ئێستا لەمەنفایەو ئۆریل ژانكارا كە تۆمەتبارە بەئاژاوەنانەوەو یاخیگەری لەزینداندایە بەدەنگی ئیسپانیەكان چونە پەرلەمانی ئەوروپاوە.
لەئیسپانیا ٣٨.٨٪ سۆشیالیستەکان ٢٠ کورسی بەدەستهێنا، حزبی راستی توندڕەو ڤاکس تەنها سێ کورسی بەدەستهێنا.
لەیۆنان حزبی محافزەکاری "دیموکراسی نوێ" ٣٣.٥٪ی دەنگەكانی بەدەستهێناو لەحزبی چەپی سیریزای سەرۆک وەزیری بردەوە كە تەنها 20% دەنگی یۆنانیەكانی بەدەستهێنا.
سەوزەكانی ئەوروپا براوە بون، بەتایبەتی لەئەڵمانیاو ئیرلەندا كە ژمارەی كورسییەكانیان لەپەرلەمانی ئەوروپادا لە ٥٠ كورسییەوە بەرز بۆوە بۆ ٥٧ كورسی.
سەوزەكانی لەئەڵمانیا 20% دەنگی ئەڵمانەكانیان بەدەستهێناو پێش سۆشیال دیموكراتەكان كەوتن.
لەهەنگاریا حزبی دژە کۆچبەرانی "فیدز"ی ڤیکتۆر ئۆربانی سەرۆك وەزیر ٥٢٪ی دەنگەکانی بەدەستهێناو ژمارەی كورسییەكانی لە١٣ کورسییەوە بو بە٢١ کورسی.
ئۆربان وتی "ئێمە بچوکین بەڵام ئەمانەوێ ئەوروپا بگۆڕین".
وتیشی "ئەم هەڵبژاردنە دەستپێکی سەردەمێکی نوێ دەبێ لەدژی کۆچبەران".