سەرۆكایەتی داواكاری گشتی بڕیاریدا بە پێكهێنانی لیژنەیەك بۆ بەدواداچونی
كەیسی بڵاوكردنەوەی چەند گرتە ڤیدیۆیەك كە كەسێك بەناوی "گۆڤەند" لە
سۆشیال میدیا بڵاویكردۆنەتەوەو دەشڵێت: رێكاری یاسایی دژ بەو كەسە دەگیرێتەبەر.
ئاوێنە: بەم دواییانە كەسێك بەناوی "گۆڤەند" لە تۆڕە
كۆمەڵایەتییەكان چەند گرتەیەكی ڤیدیۆیی ژمارەیەك كچ و كوڕی بڵاوكردۆتەوە كە
تێیاندا ئەو كچ و كوڕانە بەجیا، قسەی نەشیاو بەخۆیان دەڵێن لەبەرامبەر ئەوەی "گۆڤەند" دەستبەرداری
بڵاوكردنەوەی ئەو وێنەو ڤیدیۆیانەیان ببێت كە هەڕەشەی بڵاوكردنەوەیانی كردوە.
بەگوێرەی راگەیەندراوێكی سەرۆكایەتی داواكاری گشتی هەرێم، ئەمڕۆ یەكشەممە، بەسەرپەرشتی
دادوەر ئازاد حەسەن ئەحمەد، سەرۆکی داواکاری گشتی هەرێمی کوردستان، کۆبونەوەیەک لە
سەرۆکایەتی داواکاری گشتی ئەنجامدراوە.
كۆبونەوەكە بە ئامادەبونی سلێمان موحسین، بەرێوەبەری گشتی دەستەی سەربەخۆی
مافی مرۆڤ، موقەدەم فەرمان محەمەد مەولود، بەرێوەبەری بەرێوەبەرایەتی
بەرەنگاربونەوەی توندوتیژی دژ بە ئافرەتان لە هەولێر، دادوەر مەروان بورهان، بەرپرسی
فەرمانگەی داواکاری گشتی هەولێر، دادوەر پشتیوان سمکۆ، بەرپرسی مافی گشتی هەولێر، دادوەر
خەڵات نەجمەدین موفتی، بەرپرسی پەیوەندییەکان لە سەرۆکایەتی داواکاری گشتی و دادوەر ئاریان
نورەدین، ئەندامی دەستەی مافی گشتی لە سەرۆکایەتی داواکاری گشتی، بەڕێوەچوە.
بەگوێرەی
راگەیەندراوەكە، "وێڕای سەرکۆنەکردنی ئەو کارە نەشیاوەی دەربارەی
ئەو گرتە ڤیدیۆیانەی کە کەسێک بە ناوی (گۆڤەند) بڵاوی کردۆتەوە لە سۆشیال میدیا بەم
دواییە، کە (استهتاره) بەو ئافرەت و پیاوانەی کە لە گرتە ڤیدیۆکان ناویان هاتوە، بڕیاردرا
بە پێکهێنانی لیژنەیەک بۆ پێداچونەوەی ئەم بابەتە و چەند رێکارێکی یاسایی دژ بەو کەسە
بگرێتە بەر."