2021-09-06   413     
لەگوندێكی سەر بە دەڤەری بەرواری باڵا لە پارێزگای دهۆك سێ ئەندامی خێزانێك بە هۆی دووكەڵی تۆپەكانی توركیاوە دۆخی تەندروستیان تێكچووە، هاوكات هێزی پاراستنی گەلیش باس لەوەدەكات لە ماوەی دوو رۆژدا سوپای توركیا 17 جار گازی ژەهراوی لە چەند ناوچەیەكی سنوریی هەرێم بەكارهێناوە.
ئاوێنە: ئەوانەی دۆخی تەندروستییان تێكچووە بریتین لە: هەدیا مستەفا تەمەن 66 ساڵ، ژیمان عەبدوڵڵا تەمەن 28 ساڵ و پیاوێكی 76 ساڵە بەناوی عەبدوڵڵا حەسەن.
هەدیا مستەفا لەبارەی تۆپبارانەكە بە كەناڵی رووداوی راگەیاندوە "تۆپی توركیا وای لە ئێمە كرد، دووكەڵێكی زۆر هات و بە كچەكەم گوت كە بۆنێكی پیس دێت، بەڵام گوێی پێنەدام و من چوومە ناو خانووەكە."
بەوتەی دانیشتوانی گوندەكە یەكێك لە تۆپەكان كە لە نزیك گوندەكە كەوتوەتە خوار دووكەڵەكەی رەش بووە و تۆپێكی دیكەشیان دووكەڵەكەی زەرد بووە.
بنكەی تەندروستیی رۆزانا لە كانی ماسێ چارەسەری سەرەتایی بۆ بریندارەكان كردووە و بەوتەی رەسوول محەممەد، پزیشكی پایەبڵند لەو بنكە تەندروستییە "ئەوان هەناسەیان تەنگ ببوو، چاوەكانیان فرمێسكی دەكرد و گێژببوون، ئەو نیشانانە جێگەی گومان بوون."لەبەرئەوە چاوەڕێی ئەنجامی پشكنینی پزیشكانی زاخۆ دەكەن، تاوەكو جۆری ئەو گازەی لە تۆپبارانەكەدا بەكارهاتووە پشتڕاست بكرێتەوە.
لەلایەكی ترەوە هێزی پاراستنی گەل هەپەگە لە راگەیەنراوێكدا باسی لەوەكردووە، لە ماوەی رۆژانی چوار و پێنجی ئەیلولدا سوپای توركیا 17 جار گازی ژەهراوی لە چەند ناوچەیەكی سنووریی هەرێمی كوردستان بە كارهێناوە.