وەزارەتی دەرەوەی عێراق رایگەیاندوە، بڕیاڕه‌ ئه‌مڕۆ هەینی ئەو گەنجە كۆچبەرانەی هەرێمی كوردستان كه‌ له‌لایه‌ن توركیاوه‌ دیپۆرتی وڵاتی سوریا كرابون، بگه‌ڕێنرێنه‌وه‌ هه‌رێمی كوردستان.

ئاوێنە: ئەو كۆچبەرانە ژماره‌یان 57 كه‌سه‌ و خه‌ڵكی هه‌رێمی كوردستانن و دوای ئه‌وه‌ی له‌ توركیا ده‌ستبه‌سه‌ر كرابون، ده‌سه‌ڵاتدارانی توركیا ئه‌وانیان دیپۆرتی سوریا كردبون.

پەرلەمانتارانی عێراق غالب محەمەد و سەركەوت شەمسەدین لەگەڵ پەرلەمانتاری كوردستان سیروان محەمەد لە راگەیەندراوێكدا هاوبەشدا لەوبارەیەوە ئاشكرایان كردوە "وەزارەتی دەرەوەی عێراق بە ئێمەی پەرلەمانتارانی کوردستان و بەغدادیان راگەیاند کە پاش هەوڵ و کۆششی هەمەلایەنەی هاوبەشی پەرلەمانیمان لەگەڵ وەزارەتی دەرەوەی عێراق و لیژنەی پەیوەندەییەکانی دەرەوە لە پەرلەمانی عێراق، حکومەتی عێراق لەگەڵ دەوڵەتی تورکیا و هێزەکانی سوریای ئازاد گەیشتنە دەرئەنجامێکی دڵخۆشکەر و بریارە لە سبەینێوە ئەو گەنجەمان لە سوریاوە رەوانەی هەرێمی کوردستان بکرێنەوە."

ئەو سێ پەرلەمانتارە وتوشیانە "دەمانەوێت رای گشتی ئاگاداربێت کە پاراستن و دابینکردنی ژیانێکی شایستە بۆ هاوڵاتیانمان لەسەر خاکی خۆیان ئەرکێکی دەستوری و یاساییە لەسەر حکومەت، کە لە هەرێمی کوردستان دەسەڵات هۆکاری کۆچی بەکۆمەڵی گەنجانمانە، ئەوان هۆکارن نەک فریادڕەسیان."