بەرهەم ساڵح، سەرۆك كۆماری عێراق، ئەمڕۆ شەممە، پێشوازیكرد لە
پارێزگارەكانی هەرێمی كوردستان و لە دیداری نێوانیاندا تاوتوێی بەهێزكردنی
هەوڵەكانیان كرد بۆ گەیشتن بە رێگاچارەی گونجاو بە ئاڕاستەی چارەسەركردنی كێشە
هەڵپەسێردراوەكانی نێوان هەرێم و بەغدا.
ئاوێنە: بەپێی راگەیەندراوێكی سەرۆكایەتی كۆمار، بەرھەم ساڵح، ئەمڕۆ شەممە،
لە کۆشکی سەلام لە بەغدا پێشوازیکرد لە ئومێد خۆشناو، پارێزگاری ھەولێرو هەڤاڵ ئەبوبەکر،
پارێزگاری سلێمانی و عەلی تەتەر، پارێزگاری دھۆک و ئازاد تۆفیق رەحیم، پارێزگاری هەڵەبجە
و سەبارەت بە گۆڕانکارییەکانی بارودۆخی سیاسی و ئابوری و خزمەتگوزاری گفتوگۆکرا.
لە دیدارەکەدا بەگرنگییەوە باس لە بەھێزکردنی هەوڵەکان کرا، بۆ گەیشتن بە رێگاچارەی
گونجاو بە ئاڕاستەی چارەسەرکردنی کێشە هەڵپەسێردراوەکانی نێوان هەرێمی کوردستان و
حکومەتی فیدراڵ لە رێگای دیالۆگ و گفتوگۆ، ھەروەھا دوپاتکرایەوە لەگرنگی پاراستنی
مافە رەواکانی ھاوڵاتیان بێ جیاوازی.
لە بەشێکی دیکەی دیدارەکەدا بەرهەم ساڵح جەختیکردەوە لەگرنگی دۆزینەوەی چارەسەری
گونجاو و ریشەیی بۆ کۆتاییھێنان بە کێشە هەڵپەسێردراوەکانی نێوان ھەردو حکومەتی ھەرێمی
کوردستان و حکومەتی فیدراڵ لەسەر بنەمای دەستورو یاسا، بەتایبەتی کێشە داراییەکان
و پاراستنی مافە رەواکانی خەڵک و موچەخۆران و خانەنشینانی ھەرێمی کوردستان و عێراق
بێ جیاوازی.