2021-09-12 360
دوای ئەوەی بەرەبەیانی ئەمڕۆ یەکشەممە مستەفا کازمی، سەرۆک وەزیرانی عێڕاق بەسەرۆکایەتی شاندێکی باڵا گەیشتە تاران و لەلایەن ئیبراهیم رەئیسی، سەرۆک کۆماری ئێران پێشوازی لێکرا، ماڵپەڕێکی نزیک لەحکومەتی ئێران بڵاویکردەوە، لەکۆبوونەوەکەدا لابردنی ئاستەنگییەکانی بەردەم پەرەپێدانی پەیوەندییە ئابوری و بازرگانییەکانی نێوان تاران و بەغدا گفتوگۆیان لەسەر کراوە.
ئاوێنه: ئاژانسی تەسنیمی نزیک لە حکومەتی ئێران بڵاویکردەوە، لەکۆبوونەوەکەی نێوان مستەفا کازمی و ئیبراهیم رەئیسیدا باس لە چۆنیەتی پەرەپێدانی پەیوەندییەکانی نێوان هەردو وڵات کراوە بەتایبەت گەشەپێدانی پەیوەندییە ئابوری و بازرگانییەکان.
باس لەوەشکراوە، لەکۆبوونەوەکەدا چاودێری جێبەجێکردنی رێککەوتنی نێوان ئێران و عێراق گفتوگۆی لەسەر کراوە، بەتایبەت رێککەوتنەکانی بواری بانکی، گواستنەوە، کارەبا، غاز و لابردنی ئاستەنگییەکان کە هاتوونەتە پێش.
لەدوای دەستبەکاربوونی ئیبراهیم رەئیسی وەک سەرۆکی نوێی ئێران، مستەفا کازمی یەکەمین سەردانی بۆ ئەو وڵاتە ئەنجامدا و پرسی پەرەپێدانی پەیوەندییە بازرگانییەکان پرسێکی دیکەی کۆبوونەوەکە بووە، بەتایبەت کە عێراق دووەمین بازاری جیهانە بۆ هاوردەکردنی کاڵای ئێرانی لەدوای وڵاتی چین.
عێراق بە شێوەیەکی بەرفراوان پشت بە هاوردەی گاز و کارەبای ئێران دەبەستێت، بە جۆرێک ئێران سێیەکی پێداویستیی گاز و کارەبای عێراق دابیندەکات. بەغدا ئێستا 6 ملیار دۆلار بەهۆی دابینکردنی وزەوە بۆ عێراق قەرزداری ئێرانە.
کۆتایی مانگی رابردوو عێراق لووتکەیەکی بە ئامادەبوونی ژمارەیەک لە سەرکردە و وەزیرانی دەرەوەی وڵاتانی ناوچەکە بەست و تێیدا وەزیرانی دەرەوەی ئێران وسعودیە بەشداربوون، هەروەها ئیمانوێل ماکرۆن، سەرۆکی فەرەنساش بەشداربوو.