کونسوڵخانەی ئەمریکا لە هەولێر رایگەیاند، سەرکۆنەی ئەو هێرشە دەکەن کە بەهۆی فڕۆکەی بێفڕۆکەوانە لە هەرێمی کوردستان ئەنجامدرا و "ویلایەتە یەکگرتوەکانی ئەمریکا بەردەوامە لە پابەندبونی بە پشتیوانیکردن لە حکومەتی هەرێمی کوردستان و حکومەتی عێراق".

ئاوێنە: کونسوڵخانەی ئەمریکا لە هەولێر لەبارەی هێرشەکەی سەر فڕۆکەخانەی نێودەوڵەتی هەولێر رایگەیاند، "بە توندی سەرکۆنەی ئەو هێرشە دەکەین کە بەهۆی فڕۆکەی بێفڕۆکەوانە لە هەرێمی کوردستان ئەنجامدرا، ئەم هێرشە بەردەوامانە هەڕەشەن بۆ سەروەری و سەقامگیریی عێراق".

ئاماژەی بەوەشکردوە، "پشتیوانی لە حکومەتی هەرێمی کوردستان دەکەین لە لێکۆڵینەوەکانی بۆ دەستنیشانکردنی بەرپرسیارانی هێرشەکە".

کونسوڵخانەی ئەمریکا لە هەولێر دەڵێت، "ویلایەتە یەکگرتوەکانی ئەمریکا بەردەوامە لە پابەندبونی بە پشتیوانیکردن لە حکومەتی هەرێمی کوردستان و حکومەتی عێراق لە هەوڵەکانیان بۆ پاراستن و گەڕاندنەوەی ئاشتی و سەقامگیری".

وەین مارۆتۆ، وتەبێژی هاوپەیمانی نێودەوڵەتی دژی داعش لە تویتێکدا رایگەیاند، "کاژێر 11:43 خولەکی شەوی (11ی ئەیلول) هێزی هاوپەیمانان لە فڕۆکەخانەی نێودەوڵەتیی هەولێر بە دو فڕۆکەی بێفڕۆکەوانی کرایە ئامانج و هێزی هاوپەیمان هەردو فڕۆکەکانی خستنەخوارەوە".

ئاماژەی بەوەشکرد، یەکێک لە فڕۆکە تێکشکێندراوەکان کەوتە نێو سنوری بنکەی هاوپەیمانی نێودەوڵەتی و فڕۆکەکەی دیکەش کەوتە دەرەوەی سنوری بنکەکەوە و هێرشەکان هیچ زیانێکی گیانی و ماددیان لێنەکەوتوەتەوە