دوو کەس بەتۆمەتی سەرانە وەرگرتن دەستگیرکران
  2021-09-14       234       

بەڕێوەبەرایەتی پۆلیسی سلێمانی دەستگیرکردنی دوو کەسی بە تۆمەتی سەرانە وەرگرتن لە هاوڵاتییان راگەیاند.

ئاوێنه‌: ئەمڕۆ سێشەممە ١٤ی ئەیلول، بەڕێوەبەرایەتی پۆلیسی سلێمانی رایگەیاند:" پاش ئەوەی لە گەڕەکی سەرچنار دوو تۆمەتبار ریگریان لە هاوڵاتییەک کردووە و لە ژێر زەبری چەکدا بڕێک پارەیان لێسەندووە و دواتر بە چەک برینداریان کردووە، مەرەزەکانی بەشی پۆلیسی فریاکەوتن گەیشتنە شوێنی رووداوەکە، بەڵام تۆمەتبارەکان رووبەڕووی هێزەکانی پۆلیس بوونەتەوە و لە ئاکامدا پۆلیسێکیان بریندارکردووە و پاشان هەڵاتوون".

ئاماژەی بەوەشکرد:" دوای رووداوەکە بنکەی پۆلیسی سەرچنار بەدواداچوون و لێکۆڵینەوەی وردی دەستپێکرد و پاش وەرگرتنی بریاری دادوەر توانرا دوو تۆمەتبار بە ناوەکانی (م،خ،ف) و (س.ک.ع) دەستگیربکرێن و دەست بەسەر چەکەکەشیاندا گیرا".

 باسی لەوەشکرد:" لەکاتی لێکۆڵینەوەکاندا تۆمەتبارەکان دانیان بە تاوانەکەیاندا نا، هەروەها دانیشیان بەوەدانا کە پێشتر رێگرییان لە هاوڵاتییەکی دیکە کردووە و بە زەبری چەک پارەیان لێسەندووە، هاوکات رێگریان لە هاوڵاتییەکی دیکەش کردووە و تەقەیان لێکردوو و بە چەقۆ برینداریان کردووە".

بەڕێوەبەرایەتی پۆلیسی سلێمانی جەختیلەوەشکرد:" لە ئێستادا تۆمەتبارەکان بە بڕیاری دادوەر بەپێی ماددەکانی ٤٠٥ و ٢٣٠ و ٤٥٦ و ٣١ لە یاسای سزادانی عێراق راگیراون و لێکۆڵینەوە لەگەڵیاندا بەردەوامە".

زۆرترین بینراو
© 2021 Awene Online, Inc. All Rights Reserved.
×