2021-09-15   504     
کۆمسیۆنی هەڵبژاردنەکانی عێراق رایگەیاند، 82%ـی هاوڵاتیان کارتەکانی دەنگدانیان وەرگرتوەتەوە و پێشبینی دەکەن 50% بۆ 60% هاوڵاتیان بەشداری هەڵبژاردنی پێشوەختی پەرلەمان بکەن کە بڕیارە 10ی تشرینی یەکەم بەڕێوەبچێت.
ئاوێنە: نەبراس ئەبو سودە، یاریدەدەری وتەبێژی کۆمسیۆنی هەڵبژاردنەکانی عێراق لەلێدوانێکی رۆژنامەنوسیدا باسی لەوەشکرد، لەکۆی 17 ملیۆن کارتی دەنگدان، زیاتر لە 14 ملیۆن کارتی دەنگدان بەسەر هاوڵاتیاندا دابەشکراون و پێشبینی دەکەن 50% بۆ 60% هاوڵاتیان بەشداری هەڵبژاردنی پێشوەخت بکەن.
ئاماژەی بەوەشکردوە، کۆمسیۆنی هەڵبژاردنەکان لەئێستادا سەرقاڵی راهێنانە بەکارمەندانی سەر سندوقەکانی دەنگدان و چۆنیەتی تۆمارکردنی داتاکان، هەروەها بەهاوکاری وەزارەتی پەروەردە ئامادەکارییەکانی لە قوتابخانەکانیش بەردەوامن کە وەک بنکەی دەنگدان بەکاردەهێنرێن.
سەبارەت بە ئاستی بەشداری هاوڵاتیانیش 7ی ئەم مانگە ناوەندی "كلواذا" بۆ توێژینەوەی و راپرسی لەعێراق ئەنجامی راپرسییەکی لەبارەی ئاستی بەشداری هاوڵاتیان لەهەڵبژاردنەکەی 10ی تشرینی یەکەم بڵاوکردەوە، لەراپرسییەکەدا 3600 (سێ هەزار و شەش سەد) کەس بەشدارییانکرد لەو ژمارەیەش 29%ـی دەنگدەران وتویانە بەشداری هەڵبژاردنەکە دەکەن.
10ی تشرینی یەکەمی ئەمساڵ هەڵبژاردنی پەرلەمانی عیراق بەڕێوەدەچێت، لەو چوارچێوەیەشدا لە 31ی ئازاری ئەمساڵ پەرلەمانی عیراق بڕیاریدا سێ رۆژ بەر لە هەڵبژاردنەکان خۆی هەڵبوەشێنێتەوە.