ئاسایش 7 كەسی لەكاتی مامەڵەكردن بە دراوی ساختە و گەڕان بۆ شوێنەوار دەستگیركرد
  2021-09-16       188       

ئاسایشی سلێمانی ڕایگەیاند، لە چەند چالاكییەكدا توانیویانە حەوت تۆمەتباری دوو باندی دزینی شوێنەوار و مامەڵەکردن بە دراوی ساختەوە دەستگیربکەن.

لە ڕاگەیەندراوێكدا بەڕێوەبەرایەتیی ئاسایشی سلێمانی ئاماژەی بەوەكردووە، “بەمەبەستی پاراستنی مێژوو و کەلتووری گەلەکەمان و ڕێگریکردن لە دزین و تاڵانکردنی شوێنەوارە کۆنەکان و ساغکردنەوەی هەرجۆرە دراوێکی ساختە، دوو باندی ساختەکار و دزینی شوێنەوار دەستگیرکران و دەستیشگیرا بەسەر چەندین ئامێر و دراوی ساختە دا .”

ڕوونیشیكردووەتەوە، هێزەكانیان توانیویانە لە ڕۆژی 29/8/ 2021 لە چەند چالاکییەکدا حەوت تۆمەتباری دوو باندی دزینی شوێنەوار و مامەڵەکردن بەدراوی ساختەوە دەستگیربکەن.

ئاساسایش باسی لەوەكردووە، تۆمەتباران لەکاتی گەڕان بۆ شوێنەوارە دێرینەکان لە ناوچەی شارباژێر و قەرەداغ و لەکاتی مامەڵەکردن بە دراوی ساختەوە دەستگیرکراون.

هەر بەپێی ڕاگەیەندراوەكە، دەستگیراوە بەسەر بڕی 70 هەزار و 600 دۆلاری ساختە لە جۆری 50 دۆلاری و یەک ئۆتۆمبیل و یەک موەلیدە و چەندین ئامێردا.

ئاسایشی سلێمانی دەڵێت، “تۆمەتبارەكان بەپێی یاسای سزادانی عێراقی ڕاگیراون و لێکۆڵینەوە لە کەیسەکانیان بەردەوامە”.
زۆرترین بینراو
© 2021 Awene Online, Inc. All Rights Reserved.
×