پۆلیسی راپەڕین، ئەمڕۆ شەممە، ئاشكرایكرد، دوای نزیكەی دو مانگ لە خۆحەشاردانی، تۆمەتباری كوشتنی هاوڵاتییەك لە ناحیەی سەنگەسەر سەربە قەزای پشدەر، خۆی رادەستی پۆلیس كرد.

ئاوێنە: بەڕێوەبەرایەتی پۆلیسی راپەڕین، لە راگەیەندراوێكدا وتی"پاش ئەوەی ڕۆژی 22ی 7ی ئەمساڵ لە ناحیەی سەنگەسەر سەربە قەزای پشدەر (قەڵادزێ) لەلایەن تۆمەتبارێک بە چەکی جۆری کڵاشینکۆف تەقە لە ماڵی هاوڵاتیەک کراو بەو هۆیەوە ژنێک کوژراو دو کەسی تری بریندار کرد تۆمەتبار ڕایکرد بۆ شوێنێکی نادیار."

ئەوەشی وتوە"دوای روداوەکە بە بڕیاری دادوەرو بە ماددەی 406 لە یاسای سزادانی عێراقی فەرمان کرا بە دەستگیرکردنی تۆمەتبارەکە، بەهۆی ئەوەی تۆمەتبار دانیشتوی پارێزگای هەولێرە بنکەی پۆلیسی سەنگەسەر بەنوسراوێک داوای لە پۆلیسی هەولێر کرد بە دەستگیرکردنی، بەڵام بەهۆی نەبونی زانیاری لەسەر شوێنی خۆحەشاردانی نەتوانرا دەستگیربکرێ."

پۆلیسی پشدەر ئاشكراشیكردوە"دوای نزیکەی دو مانگ، تۆمەتبار خۆی ڕادەستی هێزەکانمان لە بنکەی پۆلیسی ناحیەی سەنگەسەر کرد."

پۆلیس هێمای بۆ ئەوەش كردوە كە تۆمەتبارەکە ناوی (ح. ش.) دانیشتوی هەولێر، لە دایکبوی ساڵی 1972، پیشەی کاسبە، تاوانەکەشی لە جەژنی قوربانی ئەمساڵ ئەنجامداوە.