2021-09-19   624     
ئەمینداری گشتیی یەكێتی جیهانی زانایانی مسوڵمان لە دەوحەی پایتەختی قەتەڕ لەگەڵ مەكتەبی سیاسیی بزوتنەوەی تاڵیباندا كۆبووەوە و پشتیوانیی خۆی و یەكێتییەكەی بۆ ئەفغانستان ڕاگەیاند.
ئاوێنە: دوای كۆبوونەوەكە، د. عەلی قەرەداغی ئەمینداری گشتیی یەكێتی جیهانی زانایانی مسوڵمان دوو تویتی بڵاوكردەوە و ڕایگەیاندووە، "پشتیوانیی براكانمان دەكەین و دەستخەڕۆیان ناكەین، بەشێك لە پشتیوانییەكەشمان پێدانی بەرچاوڕوونی و ئامۆژگارییە، بەردەوامم و ئامانجەكەم دەزانم كە هێنانەئارای زانینێكی ئیسلامییە".
لە تویتەكەی تریدا ئەمینداری گشتیی یەكێتی جیهانی زانایانی مسوڵمان دەڵێت، "دەتوانین لە بواری فێركردندا هاوكاری گەلی ئەفغانی بین، لەپێناو ڕەوشتبەرزكردنی پرۆسەی فێركردن و ئاكارەكانی فێركردن لەڕێگەی پشتبەستن بە بنەما جێگیرەكان و مامەڵەكردن لەگەڵ گۆڕاوەكاندا بەپێی ئیجتیهادی زانستی".
قەرەداغی ڕوونكردنەوەی لەو بارەیەوە خستووەتەڕوو و ڕایگەیاندووە، "دەتوانین لەڕێگەی سازدانی كۆڕی سیاسییەوە ئەو كارە بكەین، یەكێتی جیهانی زانایانی مسوڵمان پسپۆڕی زۆری هەن لە بوارە جۆراوجۆرەكاندا و زاناكانمان لە 93 وڵاتدان".