برزۆ مەجید، ئەندامی خانەی راپەڕاندن و كاندیدی بزوتنەوەی گۆڕان لە
پارێزگای هەولێر قسەكانی نێچیرڤان بارزانی لەبارەی ئەوەی كە تەنها حساب بۆ پارتی
دەكرێت، بە هۆکارێک بۆ "بەهێزکردنى رۆحى لێکترازانى کورد" وەسف دەکات.
ئاوێنە: رۆژى یەکشەممە
نێچیرڤان بارزانى سەرۆکى هەرێمى کوردستان و جێگرى سەرۆکى پارتى دیموکراتى کوردستان
لە بانگەشەى هەڵبژاردنى حزبەکەیدا لە هەولێر رایگەیاند، ئەگەر سەیری نەخشەی سیاسی
بکەین لە کوردستان، تەنیا حزبێک کە حیسابی بۆ دەکرێت پارتییە.
لەو بارەیەوە برۆز مەجید، بە میدیای رەسمی حزبەكەی وت"ئەو بابەتە بەو
شێوەیە نیە، ئەگەر واش بێت کەواتە پارتى ئامادەیە لایەنە نەیارو ناحەزەکانى کورد،
بەجیا مامەڵە لەگەڵ لایەنەکان بکەن بۆئەوەى پەرتەوازەمان بکەن."
لەبەشێکى دیکەى قسەکانیدا برزۆ مەجید رایگەیاند، ئەو جیهانبینى و فەلسەفەیەى
بۆ دیموکراسیەت هەیە لەگەڵ هەڵسوکەوتەکانى حزبەکەى سەرۆکى هەرێم یەکناگرێتەوە،
داخستنى پەرلەمانى کوردستان و دۆخى ئازادى رادەڕبرینى لە ناوچەکانى ژێردەسەڵاتى
پارتى دیموکراتى کوردستان بە نمونە هێنایەوە.
وتیشى: هیوادارین سەرۆکى هەرێمى کوردستان بە قسەکانیدا بچێتەوە، چونکە خزمەت
بە هەرێمى کوردستان و یەک گوتارى ناکات.
ئاماژەى بۆ ئەوەشکرد، سەرۆکى هەر هەرێم و وڵاتێک لەهەر دۆخێكدا بەتایبەتى لە
دۆخى هەڵبژاردندا کە جۆرێک لە هەستیارى و ململانێى تێدا زەق دەبێتەوە، دەبێت بە
زمانێک قسەبکات کە رۆحى ئاشتەوایى و پێکەوەیى و سەقامگیرى بپارێزێت.