موقتەدا سەدر، رابەری رەوتی سەدر، كە بەپێی ئەنجامەكانی كۆمسیۆن هاوپەیمانییەكەی زۆرترین كورسی پەرلەمانی هێناوە، رایگەیاند، كوتلەی سەدر گەورەترین كوتلەی پەرلەمانییەو كاردەكەن بۆ بەرزكردنەوەی  بەهای دیناری عێراقی و داواش لە باڵیۆزخانەی وڵاتان دەكات كە دەستوەردان لە پێكهێنانی حكومەتدا نەكەن.

ئاوێنە: موقتەدا سەدر، ئەمڕۆ دوشەممە، دوای راگەیاندنی ئەنجامە بەرامییەكانی هەڵبژاردن لەلایەن كۆمسیۆنەوە، لە پەیامێكی تەلەفزیۆنیدا رایگەیاند، ئێمە گەورەترین كوتلەی پەرلەمانی عێراقین.

بەپێی ئەنجامە بەراییەكانی هەڵبژاردن، كوتلەكەی سەدر 73 كوسی پەرلەمانی بەدەستهێناوە كە بەوەش بە پلەی یەكەم دێت.

سەدر جەختی كردەوە كە لە ئەمڕۆ بەدواوە لە عێراق "گەندەڵ و گەندەڵكاران جێیان نابێتەوە."

هەروەها وتیشی، پێشوازیی لە سەرجەم باڵیۆزخانەكانی وڵاتان دەكەن بەو مەرجەی دەستوەردان لەكاروباری عێراق و پێكهێنانی حكومەتدا نەكەن.

هەروەك لە بەشێكی دیكەی قسەكانیدا جەختی كردەوە كە دەبێت چەك تەنها بەدەست دەوڵەتەوە بێت و لەدەرەوەی ئەوە قەدەغە بكرێت.

هەروەها وتیشی، كاردەكەین بۆ بەرزكردنەوەی بەهای دیناری عێراقی و وتیشی"نەوت گەل بۆ گەلەو بەهای دینار وا لێدەكەین پێ بەپێ بگاتە هاوشانی دراوە جیهانییەكان."

جەختیشی كردەوە كە سزای هەمو گەندەڵكارێك دەدەن هەر كەسێك بێت. وتیشی"ئەگەر ناچاربین بە خوێنمان گەندەڵی لەناودەبەین."