کەمال کەرکوکی له‌ باره‌ی ڕوداوه‌كانی كه‌ركوك: کەسانێك لە ناو یەکێتی ئەم ئاژاوەیان دروستکردوە
  2021-10-13       856       
کەمال کەرکوکی، سەرۆکی ئەنجومەنی سەرکردایەتی کەرکوك -گەرمیانـی پارتی دیموکراتی کوردستان لەبارەی ڕووداوەکانی شەوی ڕابردووی کەرکوک و دەستگیرکردنی نزیکەى 65 گەنجی کورد دەڵێت، "کەسانێك لە ناو یەکێتی نیشتمانی کوردستان ئەم ئاژاوەیان دروستکردووە، بۆ ئەوەی ئێوەی دڵسۆز و نیشتمان پەروەریش پەلکێشی ناو ئەم کێشەیە بکەن".  
  
ئاوێنه‌: کەمال کەرکوکی لە ڕاگەیەندراوەکەدا  دەڵێت، "بەھۆی ئەو شکستەی تووشی بوونە کە چەند کورسیەکیان لەدەستدا، چەند کەسێکی یەکێتی نیشتمانی کوردستان لە کەرکوک تەقەیان بەسەر سوپا و ئاھەنگێڕاندا کردووە و کە بووە ھۆی ئەوەی حەشدی شەعبی و سوپای عێراقی و پۆلیس، بە ناھەق لەگەڵ چەند گەنجێکی دڵسۆز بە دەست و بە قۆناخە تفەنگ رووبەرووی یەک ببنەوە، لە ئەنجامدا لە لایەن ژمارەیەکی کەسی کورد وەڵام درانەوە، پاشان سوپا و پۆلیسی ئیتحادی ژمارەیەك کەسی بێتاوانیان لەو گەنجانە دەستگیر کرد".  

کەمال کەرکووکی ڕاشیگەیاند، "داوا لە فەرماندەی عەملیات و سوپای عێراق و پۆلیسی محەلی کەرکوك دەکەین، بە ھێمنی و ئارامی بە ئەرکی خۆیان وەکو پێش ھەڵبژاردنەکان ھەڵسن. بەم شێوەی ئێستا و تێکدانی ئارامی لە ھاوڵاتیانی کوردی شارەکە ، رێگای چارەسەر نیە و بە پێچەوانەوە دەبێتە ھۆی ئاڵۆزی زیاتر".  

دەقی راگەیەندراوەکە:..  

ئاگاداریەك بۆ گەلی کوردی دڵسۆزو وخۆراگری شاری کەرکووك و گشت پێکھاتەکانی کەرکوك .  

فەرمان بۆ گشت بەرپرس و ئەندام و لایەنگرانی پارتیمان پارتی دیموکراتی کوردستان لە سنوری ئەنجومەنی سەرکردایەتی کەرکوك-گەرمیان.  

دوێنێ ژمارەیەك لەناو یەکێتی نیشتیمانی کوردستانی بەچەك بەھۆی ئەو شکستەی تووشی بوونە کە چەند کورسیەکیان لەدەستدا، بەم ھۆیەوە ئەو کەسانەی ناو یەکێتی نیشتیمانی کوردستان لە کەرکووک تەقەیان بەسەر سوپاو ئاھەنگێڕاندا کردووە و کە بووە ھۆی ئەوەی حەشدی شەعبی و سوپای عێراقی و پۆلیس ، بە ناھەق لەگەڵ چەند گەنجێکی دڵسۆز بە دەست و بە قۆناخە تفەنگ ڕووبەرووی یەک ببنەوە، لە ئەنجامدا لە لایەن ژمارەیەکی کەسی کورد وەڵام درانەوە و پاشان سوپا و پۆلیسی ئیتحادی ژمارەیەك کەسی بێتاوانیان لەو گەنجانە دەستگیر کرد.  

ئەمشەو لیوای ٦١ بە ھێزێکی زۆرەوە مداھەمەی شۆڕجەیان کردووە و (٣٥) لاوی کوردی بێتاوانیان لە شورجە دەستگیر کردووە !! و لە ڕەحیماوەش (٢٩) کەسیان دەستگیرکردووە !!موبایلەکانیان دەپشکنن.  

بۆیە ئێمە وەکو ئەنجومەنی سەرکردایەتی کەرکوك-گەرمیان بەم پەیامەمان داوا دەکەین لە گشت دڵسۆزانی شاری کەرکوك کە بە ھەند وەری بگرن:-  

1- داوا دەکەین لە گشت بەرپرس و کادرو ئەندام و لایەنگرانی پارتیمان و گشت دانیشتوانی دڵسۆز و کوردە سەربەرزەکانی شاری کەرکوك و گەرمیان بە ھەموو توانایان ئارامی بپارێزن و چاوکراوە بن ، نەبادا تێکدەران فیتنەیەكەیان سەربگرێت و ھەموو لایەك تێدا توشی زیانبن.  

2- لەھەمان کات داوا لە فەرماندەی عەملیات و سوپای عێراق و پۆلیسی محەلی کەرکوك دەکەین بە ھێمنی و ئارامی بە ئەرکی خۆیان وەکو پێش ھەڵبژاردنەکان ھەڵسن.  

3- بەم شێوەی ئێستا و تێکدانی ئارامی لە ھاوڵاتیانی کوردی شارەکە ، ڕێگای چارەسەر نیەو بە پێچەوانەوە دەبێتە ھۆی ئاڵۆزی زیاتر..  

4- بەھەمان شێوە داوا لە پارتییە دڵسۆزەکان و خەڵکی بە شەرەفی شاری کەرکووک دەکەین ھێمنی بپارێزن و دان بەخۆیاندا بگرن و ھاوکار بن بۆ پارستنی ئارامی .  

5- بۆ ئەوەی با ئەو ژمارە تێکدەرانەی ناو یەکێتی نەبنە ھۆی تێکدانی دڵخۆشی ئەو سەرکەوتنە گەورەیەی کە بەدەست ھاتووە و نەبێتە ھۆی ھیچ ڕوداوێکی دڵ تەزێن لە شارە خۆشەویستەکەمان کەرکوك .  

6- کەسانێك لە ناو یەکێتی نیشتیمانی کوردستان ئەم ئاژاوەیان دروست کردووە بۆ ئەوەی ئێوەی دڵسۆز و نیشتیمان پەروەریش پەلکێشی ناو ئەم کێشەیە بکەن.  

7- دووبارە داوا لە سوپا و ھێزە ئەمنییەکانی عێراق لە کەرکووک بە گشتی دەکەین ھێمنانە مامەلەی دروست لەگەڵ خەڵکی شاری کەرکووک بکەن و کۆتایی بە مداھەمەکانتان بێنن بۆ ئەوەی ئەزیەتی دانیشتوانەکانی شارەکە نەدەن و گشت دەستگیرکراوان بەزوترین کات ئازاد بکەن ، بۆ ئەوەی بەرژەوەندی ھەموو لایەک و گیانی ھەموو خەڵک و سەقامگیری شاری کەرکوکی دڵی کوردستان بە باشی پارێزراو بێت.  

دکتور کەمال کەرکوکی  

سەرۆکی ئەنجومەنی کەرکوك -گەرمیان  
زۆرترین بینراو
© 2021 Awene Online, Inc. All Rights Reserved.
×