لیرەی توركی بۆ ئاستێكی پێوانەیی دابەزیی
  2021-10-14       860       

لیرەی توركی بۆ ئاستێكی پێوانەیی دابەزیی و گەیشتە 9.18 بەرامبەر دۆلارێكی ئەمریكی ئەمەش دوای دەستپێكێشانەوەی ژمارەیەك بەرپرسی بانكی ناوەندی لەلایەن ئەردۆغان-ەوە.

ئاوێنه‌: ڕەجەب تەیب ئەردۆغان، سەرۆكی توركیا لە كاتژمێرەكانی یەكەمی ئەمڕۆدا بڕیارێكی دەركرد دەربارەی دەستپێكێشانەوەی سێ بەرپرسی بانكی ناوەندی و دامەزراندنی دووی دیكە.

بڕیارەكە هەریەك لە سەمیج تومان و ئۆگور نامق كوچك، جێگرانی سەرۆكی بانك و عەبدوڵا یافاش، ئەندامی ئەنجومەنی سیاسەتە نەختینەكانی گرتووەتەوە، كە ئەمەی دواییان پێنج مانگە لەو پۆستەدا دانراوە.

هەر بەپێی بڕیارەكە تەها چاناق، وەك جێگری سەرۆكی بانكی ناوەندی و یوسف تونا، وەك ئەندامی ئەنجومەنی سیاسەتی نەختینە دیاریكراون.

بەڵام بڕیارەكە بووە هۆی دابەزینی بەهای لیرەی توركی بۆ كەمترین ئاست و بۆ سێیەم جار لەسەریەك ژمارەی پێوانەیی تۆماركرد و 9.18 لیرەی بەرامبەر هەر دۆلارێك تێپەڕاند.

مانگی ڕابردوو بانكی ناوەندیی توركیا نرخی سەرەكیی سودی لە 19%ەوە بۆ 18% كەمكردەوە، سەرەڕای بەرزبوونەوەی هەڵاوسانی ساڵانە بۆ نزیكەی 20% لە هەنگاوێكدا كە شارەزایان بە بەڵگەیەكی نوێی دەستێوەردانی سیاسی ئەردۆغان-یان ناوبرد.
زۆرترین بینراو
© 2021 Awene Online, Inc. All Rights Reserved.
×