2021-10-18   862     
دوای ڕەتکردنەوەی ئەنجامەکانی هەڵبژاردن لەلایەن زۆرینەی پارتە شیعییەکان کە نزیکن لەئێرانەوە بەپاساوی بونی ساختەکاریی تێیدا، هاوپەیمانی فەتحی سەر بەهادی عامری دەڵێت:"بەڵگەمان لایەن دوو دەوڵەت لەپشت یاریکردنن بەئەنجامەکانی هەڵبژاردنی پێشوەختەی پەڕلەمانی عێراق".
زەینەب موسەوی پاڵێوراوی سەر بەهاوپەیمانی فەتح لەلێدوانێکی ڕۆژنامەوانیدا ڕایگەیاند، "بەبەڵگەوە دەیسەلمێنین کە هەریەک لەئیماراتو بەریتانیا لەپشت گۆڕینی ئەنجامەکانی هەڵبژاردنەوەن".
بەوتەی موسەوی، "بەریتانیاو ئیمارات لەپشت دزینی دەنگی کاندیدانی فەتحو بەشێک لەلایەنەکانی ترەوەنو بەخشیویانن بەو لایەنانەی لەئەمریکاوە نزیکن".
جەختیشیکردۆتەوە، بەئامانجگرتنی فەتح بەهۆی ئەوەوە بوە کە ئەو هاوپەیمانێتییە دەنگی ڕاستەقینەی بەرگریکردنە لەحەشدی شەعبی لەبەرامبەر دەستتێوەردانە دەرەکییەکان.
ڕونیشیکردۆتەوە، لەماوەی چەند ڕۆژی داهاتودا بۆ هەمولایەک ڕوندەبێتەوە کە ئیمارات تاچەند دەستتێوەردانی لەئەنجامی هەڵبژاردنەکدا کردوەو بۆ بەرژەوەندیی چەند لایەنێکی سیاسیی گۆڕانکاریی تێداکردون.