"ئامۆژگارییەك" لەكۆمەڵی دادگەرییەوە بۆ مەلا بەختیارو فازڵ میرانی: وریای قسەکانتان بن
  2021-10-18       1688       

محه‌مه‌د حه‌كیم، وته‌بێژی كۆمه‌ڵی دادگه‌ریی كوردستان وەڵامی قسەكانی ئەمڕۆی مەلا بەختیار، ئەندامی ئەنجومەنی باڵای سیاسی و بەرژەوەندی یەكێتی و فازڵ میرانی، سكرتێری مەكتەبی سیاسی پارتی دەداتەوەو دەڵێت: "ئامۆژگاریتان ئەکەم لە کۆبونەوەکان وریای قسەکانتان بن."

ئاوێنە: ئەو وەفدەی پارتی دیموكراتی كوردستان كە بە سەرۆكایەتی فازڵ میرانی سەردانی سلێمانییان كردبو، ئێوارەی ئەمڕۆ دوشەممە، لەدوایین وێستگەی سەردانەكەیاندا، لەگەڵ مەلا بەختیار كۆبونەوەو لەسەرەتای كۆبونەوەكەدا باسیان لە هەڵوێستی كۆمەڵی دادگەری و نەوەی نوێ كرد، كە بڕیاریانداوە بەشداریی كۆبونەوەكانی پێكهێنانی حكومەتی نوێی عێراق نەكەن و مەلا بەختیار بە "گاڵتەوە" باسی هەڵوێستەكەی كۆمەڵی دادگەری كرد.

بەپێی گرتەی ڤیدیۆیی كۆبونەوەكە كە ئاوێنە دیویەتی، یەكێك لە ئەندامانی وەفدەكەی پارتی دەڵێت، كۆمەڵی دادگەری (لەزاری محەمەد حەكیم، وتەبێژی حزبەكەوە) رایگەیاندوە، بەشداری گفتوگۆكانی پێكهێنانی حكومەتی عێراق ناكەن.

لەوەڵامدا فازڵ میرانی دەڵێت "مەرج نییە هەرچی محەمەد حەكیم بیڵێت وابێت." پاشان مەلا بەختیاریش دەڵێت"ئەو هەڵوێستەی كۆمەڵ واقیعیەتێكی تیایە، چونكە بە یەك كورسییەوە گفتوگۆی چی بكەن."

لەوەڵامی ئەو قسانەدا، كەمێك لەمەوبەر محەمەد حەكیم، وتەبێژی كۆمەڵی دادگەری لە رونكردنەوەیەكدا، وتویەتی"کاک مەلا بەختیار لە بری گاڵتەکردن بە کۆمەڵ خەمی حزبەکەی خۆت بخۆ."

ئەوەشی خستۆتەڕو"کاک فازڵ میرانی، من وتەبێژی کۆمەڵم و ڕەئی جەنابی سەرۆک و ئەنجومەنی باڵای حزب ڕادەگەیەنم، لە نێو حزبێکی خواپەرست نەک شەخس پەرست."

هەروەها وتوشیەتی"ئامۆژگاریتان ئەکەم لە کۆبونەوەکان وریای قسەکانتان بن، نەبادا باسی ھەندێک کەسی تر بکەن، دواتر قسەکان بگاتەوە جێی خۆیی و ژیانتان بکەوێتە مەترسییەوە."

لە بەشێكی دیكەی دیدارەكەی نێوان مەلا بەختیار و وەفدەكەی پارتیدا، باس لە هەڵوێستی شاسوار عەبدولواحید، سەرۆكی جوڵانەوەی نەوەی نوێ دەكرێت كە ئەویش وەك كۆمەڵ بڕیاریداوە بەشداری گفتوگۆكان نەكات، بەڵام مەلا بەختیار دەڵێت"شاسوار ئاڕاستەكەی شتێكی ترە، فەرق ئەكات، ئەو هەر لە ئەوەڵیشەوە وتویەتی، ئێمە لەگەڵ پارتی و یەكێتی دانانیشین. ئەوە رێگایەكەو گرتویەتی بزانین ئەنجامەكەی دەگاتە كوێ."

دەقی رونكردنەوەكەی كۆمەڵی دادگەریی كوردستان...

 وەڵام و ئامۆژگارییەک بۆ بەڕێزان مەلا بەختیارو فازڵ میرانی

کاک مەلا بەختیار لە بری گاڵتەکردن بە کۆمەڵ خەمی حزبەکەی خۆت بخۆ.

کاک فازڵ میرانی، من وتەبێژی کۆمەڵم و ڕەئی جەنابی سەرۆک و ئەنجومەنی باڵای حزب ڕادەگەیەنم، لە نێو حزبێکی خواپەرست نەک شەخس پەرست.

ئامۆژگاریتان ئەکەم لە کۆبونەوەکان وریای قسەکانتان بن، نەبادا باسی ھەندێک کەسی تر بکەن، دواتر قسەکان بگاتەوە جێی خۆیی و ژیانتان بکەوێتە مەترسییەوە.

محه‌مه‌د حه‌كیم
وته‌بێژی كۆمه‌ڵی دادگه‌ری كوردستان

زۆرترین بینراو
© 2021 Awene Online, Inc. All Rights Reserved.
×