لیژنەی كاروباری تەندروستیی پەرلەمانی كوردستان هۆشداریدەدات لەوەی لەكاتێكدا
ژمارەی توشبوانی كۆرۆنا رو لە زیادبونە بەڵام رێژەی وەرگرتنی ڤاكسین كەمە كە "تاكە
هیوایە بۆ كۆنترۆڵكردنی پەتاكە"و داواش لەهاوڵاتیان دەكات پەلەبكەن لە
وەرگرتنی ڤاكسین.
ئاوێنە: لیژنەی كاروباری تەندروستیی پەرلەمانی كوردستان، ئەمڕۆ چوارشەممە،
لە راگەیەندراوێكدا وتی"وەرگرتنی ڤاکسین تاکەهیوایە بۆ کۆنتڕۆڵکردنی پەتای کۆڕۆنا."
ئەوەشی خستۆتەڕو"جارێکی تر ژمارەی توشبوانی کۆڕۆنا ڕو لە
زیادبونە لە هەرێمی کوردستان و دوبارە فشاری زیاد لە پێویست کەوتۆتەوە سەر نەخۆشخانە
و دەزگا تەندروستییەکانی کۆڕۆنا."
بەپێی راگەیەندراوەكە "هەرچەندە لە ئێستادا بڕێکی باش لە ڤاکسینی
کۆڕۆنا لە بنکەکانی پێدانی ڤاکسین لە شارەکانی هەرێم بەردەستە، بەڵام بەداخەوە ڕێژەی
کوتان و ئەو کەسانەی ڤاکسینی دژە کۆڕۆنایان وەرگرتوە کەمە و لە ئاستی پێویست و چاوەڕوانکراو
نییە."
ئەوەشی خستۆتەڕو"لەبەرئەوە مەترسی هەیە جارێکی تر هەرێمەکەمان
ڕوبەڕوی شەپۆڵێکی تری کۆڕۆنا ببێتەوە. بۆیە داواکارین لە هاوڵاتییانی خۆشەویست
پەلە بکەن لە وەرگرتنی ڤاکسین و هانی کەسوکاریان بدەن هەموان ڤاکسینی کۆڕۆنا وەربگرن
لەپێناو پاراستنی تەندروستی و گیانی خۆتان و ئازیزانتان."
لیژنەی كاروباری تەندروستی پەرلەمانی
كوردستان بەتایبەت داوای لە مامۆستایان و سەرجەم فەرمانبەران كردوە كە دەستپێشخەری بکەن لە خێرا
وەرگرتنی ڤاکسین.