جەمال کۆچەر: خەڵکی بادینان ناڕەحەتن لەگرتنی چالاکوانان، ئەمە هۆكارێكی دەنگ زۆر هێنانم بو
  2021-10-24       361       

جەمال کۆچەر، کاندیدی سەركەوتوی یەکگرتوی ئیسلامی بۆ پەرلەمانی عێراق، کە لە ناوچەی بادینان زیاتر لە 56 هەزار دەنگی بەدەستهێناوەو زۆترین دەنگە لەسەر ئاستی عێراق، پێی وایە ناڕەحەتی خەڵكی بادینان لەگرتنی رۆژنامەنوسان و چالاكوانان ، یەكێك بوە لەو هۆكارانەی كە دەنگی زۆری هێناوە.

ئاوێنە: جەمال كۆچەر، ئەمڕۆ یەكشەممە، بە بەشی كوردی دەنگی ئەمریكای راگەیاندوە"بۆیە ئەو دەنگە زۆرەم لە بادینان هێنا، چونکە خەڵک بە هۆشیاریەوە دەنگیداوە، خەڵک حەزی لە گۆڕانکاریە و بێزاربوە لە چینی دەسەڵاتدار."

بەبڕوای جەمال کۆچەر، دەستگیرکردنی ڕۆژنامەنوس و چالاکوانانی بادینانیش کاریگەری هەبوە لەسەر بەرزی دەنگەکانی و وتویەتی"خەڵکی بادینان ناڕەحەتن بە گرتنی چالاکوان و ڕۆژنامەنوسان و حەزیان لە ئازادیە."

جەمال کۆچەر، جەختی كردۆتەوە كە "بێزاری خەڵکی کردبوە سێ بەش، بەشێکیان نەچون بۆ دەنگدان، بەشێکیان دەنگەکانیان سوتاند، بەشێکیشیان دەنگیان دا بەوانەی بەشێک نەبون لە خوڵقاندنی ئەم دۆخە خراپە."

کاندیدە سەركەوتوەكەی یەکگرتوی ئیسلامی رونیکردۆتەوە، حیزبەکەی لەو حیزبە دەگمەنانەی عێراقە کە لەم هەڵبژاردنەدا، ڕێژەی دەنگ و ژمارەی کورسیەکانیشی زیادیکردوە، وتوشیەتی"حیزب هەیە کورسی زیادیکردوە، بەڵام دەنگی کەمیکردوە، هەشە کورسی کەمیکردوەو دەنگی زیادیکردوە، لەکاتێکدا یەکگرتوی ئیسلامی دەنگ و کورسیشی زیادکردوە."

لەکۆتایی گفتوگۆکەیدا لەگەڵ دەنگی ئەمەریکا، جەمال کۆچەر وتی"ڕێگە لە ساختەکاری گیرا، حیزبەکان نەیانتوانی ئیرادەی خەڵک تەزویر بکەن، لامان سەیربو، ئینجا دروشم باوی نەماو خەڵک بەهۆشیاریەوە دەنگیدا."

زۆرترین بینراو
© 2021 Awene Online, Inc. All Rights Reserved.
×