موقتەدا سەدر: ڕێگە بە پێشێلكردنی یاسا نادەین
  2021-10-26       159       
موقتەدا سەدر ڕێبەری ڕەوتی سەدر، پەیامێك ئاراستەی حكومەت و هاوڵاتییان دەكات و باس لەوە دەكات كە ڕێگە بە پێشێلكردنی یاسا نادەن و سەرپێچیكاران سزادەدەن، وەك ئاماژەیەك بۆ گرتنەدەستی حكومەت لەلایەن ڕەوتەكەیەوە، هەروەها ئەو ڕەفتار و تاوان و دیاردانەشی بڵاوكردووەتەوە كە بەهۆیانەوە ئەنجامدەرانیان سزادەدرێن.

ئاوێنە: لە تویتێكدا ئەمڕۆ سێشەممە سەدر ڕایگەیاند، پێویستە حكومەت ژیانێكی شایستە بۆ هاوڵاتییان دەستەبەربكات و جیاكاری لەنێوان ڕۆڵەكانی گەلدا نەكات”.

دەڵێت، “ئەمەش پێویستی بە هاوكاریی هاوڵاتییانە و نابێت لەسەرووی یاساوە بن و دەبێت پابەندی ببن و تەنانەت پێشێلكردنی یاسا لەلایەن هاوڵاتییانەوە، وادەخوازێت سزاكان كارابكرێن”.

لەدرێژەی تویتەكەیدا ڕێبەری ڕەوتی سەدر ئاشكرایكردووە، “سیاسەتی داهاتوومان ئەوەیە بە جەربەزەییەوە مامەڵە لەگەڵ هەر هاوڵاتییەكدا بكەین كە دەستدرێژی بكاتەسەر یاسا، وەك زیادەڕۆییكردنەسەر ئاو و كارەبا یاخود داگیركردنی شۆستە و شوێنە گشتییەكان و سەرپێچیی هاتوچۆ و تەقەكردن لە بۆنەكاندا و گرتن و داخستنی ڕێگا لە بۆنەكاندا”.

زیاتری ئاشكراكردووە و دەڵێت، “بڵاوكردنەوەی پڕوپاگەندەی درۆ و نانەوەی ئاژاوەی تایفی و بەرتیل وەرگرتن و دەستدرێژیكردنەسەر كارمەندانی پەروەردەیی و تەندروستی و دەرچوواندنی بەڵگەنامەی ساختە و بەرزكردنەوەی نرخ و قۆرخكردنی بازاڕ” سزایان بەدواوەیە.

بەشێكی تر لەو پێشێلكارییانەی سەدر هەڕەشەی سزادانی ئەنجامدەرانیان دەكات بریتین لە، “داگیركردنی زەوی و موڵكی كەمایەتییەكان و دروستكردنی خانوو بەشێوەی زیادەڕۆیی و بەكارهێنانی تۆڕە كۆمەڵایەتییەكان بۆ گێچەڵپێكردن و هەڕەشە و ڕفاندن و دەستدرێژی سێكسی، هەروەها توندوتیژیی خێزانی و بەئاشكرا بەڕۆژوونەبوون لە مانگی ڕەمەزاندا”.

“بەكارهێنانی ماددەی هۆشبەر و پەلاماردان و دەستدرێژیكردنەسەر بازگە ئەمنییەكان و بازگەكانی هاتوچۆ و پابەندنەبوون بە یاساكانیانەوە، دەستدرێژی و زیادەڕۆییكردنەسەر موڵكی گشتی و تایبەت و باندەكانی دەرۆزەكردن” بەشێكی تری ئەو كار و كەس و دیاردانەن كە ڕێبەری ڕەوتی سەدر هەڕەشەی سزادانی لەبارەیانەوە كردووە، ئاماژە بۆ ئەوەش دەكات كە “بەرپرس و هاوڵاتیش سزادەدرێن لەپێناو عێراقێكی بەدەر لە تاوان و گوناهـدا”.
زۆرترین بینراو
© 2021 Awene Online, Inc. All Rights Reserved.
×