وێنەی روداوی ئەو ئاڵایەی كە حكومەت دەڵێت، خۆپیشاندەران "سوكایەتیان پێكردوە"، كۆنە
  2021-11-24       954       

بەپێی بەدواداچونەكان وێنەی ئەو ئاڵایەی كە حكومەتی هەرێمی كوردستان دەڵێت، لە خۆپیشاندانەكانی خوێندكاراندا لە سلێمانی "سوكایەتی" پێكراوەو كۆنەو مێژوەكەی بۆ ساڵی 2020 دەگەڕێتەوە.

ئاوێنە: عەلی حەمەساڵح، كەمێك لەمەوبەر لە لاپەڕەی خۆی لە فەیسبوك نوسیویەتی"ئەو ئاڵایەی گوایە "چەند کەسێک بێڕێزیان پێکردوە.. ڕەسمەکە ھی 10ی 2ی 2020ەو لای زانکۆی ئەمریکییە ڕەشەبا خستویەتی. ئەو فێرخوازانە کۆی دەکەنەوە، یەکێكیان بەرھەم کاکە زاڵە، بێڕێزی ئەوەیە لەسایەی ئەم ئاڵایەدا دزی لە میللەتی خۆت بکەیت."

هەروەها بەرهەم كاكەزاڵ، كە یەكێك بوە لەو كەسانەی بەشداری لە كۆكردنەوەی ئاڵاكەدا كردوە، لە رونكردنەوەیەكدا بۆ رایگشتی، ئەمڕۆ چوارشەممە، رایگەیاند"ھاوبیرانی زێدە خۆشەویست ئەو وێنەیە شاری سلێمانییەو بەرامبەر زانکۆی ئەمریکییە، مانگی 2ی 2020ە، رەشەبا ئاڵاکەی خستبو ئێمەو چەند برادەرێک کە لەدەوام دەگەڕاینەوە سەیارەکانمان وەستان تا ئاڵاکە کۆبکەینەوە. ئەوە پەیوەندی بەخۆپشاندانەوە نییە، تکایە تێمەکەون. ئەوەی ئەڵێ لەوێ بوم درۆئەکات ئەو ئاڵایە دڕابو، کاک ئەردەڵان تەیفور نامەی بۆ پەیجی کاک قوباد ناردبو کە ئاڵاکە نۆژەن بکەنەوە ئەوکات باش توند نەکرابو، رەشەباکەش بەھێزبو، بۆیە کەوتبو."

ئەوەش لەكاتێكدا كە بەبێ هیچ لێكۆڵینەوەیەكی لەبارەی دروستی و نادروستی روداوی ئەو ئاڵایەوە، ئەمڕۆ ئەنجومەنی وەزیرانی هەرێم لە كۆبونەوەی خۆیدا "بە توندترین شێوە ئیدانەو سەرکۆنەی ئەو بێ ڕێزی و سوکایەتییە"ی كرد "کە لە لایەن هەندێک کەسەوە بەرامبەر پیرۆزییەکانی هەرێم و ئاڵای پیرۆزی کوردستان کرا."و وتیشی"ڕێکاری یاساییش بەرامبەر ئەنجامدەرانی ئەم سوکایەتییە دەگرێتەبەر."
 


زۆرترین بینراو
© 2021 Awene Online, Inc. All Rights Reserved.
×