ئەندامێكی سەركردایەتی یەكێتی: هەموان هاوڕان لەسەر بەکارنەهێنانی هێز لە کێشە نێوخۆییەکاندا
  2021-11-27       954       

ئەندامێکی سەرکردایەتی یەکێتی ڕایدەگەیەنێت، سیستەمی هاوسەرۆکی بۆ بەڕێوەبردنی یەکێتی گونجاو نییە، دەبێت سیستەمێک پەیڕەو بکرێت لەگەڵ واقیعی ئێستای حیزبەکە بگونجێت، جەخت لەوەشدەکاتەوە كە سەرکردایەتی حیزبەکەی هاوڕان لەسەر بەکارنەهێنانی هێز لە کێشە ناوخۆییەکاندا.

ئاوێنە: پۆڵا تاڵەبانی، ئەندامی سەرکردایەتی یەکێتی، ئەمڕۆ شەممە، لە گفتوگۆیەكدا لەگەڵ بەشی كوردی دەنگی ئەمریكا رایگەیاند"سەرکردایەتی یەکێتی لەهەوڵدایە، کێشەکان بەگفتوگۆ چارەسەر بکات. لەهەوڵەکانمان بەردەوامین بۆ چارەسەرکردنی کێشەکان بە دیالۆگ و گفتوگۆ."

سەرکردەکەی یەکێتی ڕونیکردەوە، هەندێکجار ڕوداوەکان سەردەکێشن بۆ دۆخی نەخوازراو، لە کاتێکدا ئەو دۆخە نەخوازراوە خواستی هیچ سەرکردەیەکی یەکێتی لەسەر نییە بە هاوسەرۆکیشەوە، وتی"کەس لەگەڵ ئەوەنییە کێشەکان بەهێز چارەسەر بکرێن، هەموی لەگەڵ دیالۆگ و گفتوگۆدایە."

لە ئێستادا لاهور شێخ جەنگی وەکو هاوسەرۆکی یەکێتی خۆی دەناسێنێت، لەکاتێکدا باڤڵ تاڵەبانی جەخت لەسەر دورخستنەوەی دەکات، لەبارەی سیستەمی هاوسەرۆکیەوە، پۆڵا تاڵەبانی وتی"بەشێکی زۆر لەناوخۆی یەکێتی پێیانوایە سیستمی هاوسەرۆکی گونجاو نیسە، لەگەڵ ئەوەن شتێکی گونجاو بدۆزرێتەوە کە لەگەڵ واقیعی یەکێتی بگونجێت."

لەچەند ڕۆژی ڕابردودا، عەمید موراد کانی کوردەیی فەرماندەی سەربازی نزیک لە لاهور شێخ جەنگی لە ڕانیە کوژرا و دواتر میدیای یەکێتی هۆکاری کوشتنەکەی بۆ ئەوە گێڕایەوە، گوایە داواکراو بوە و ڕوبەڕوی هێزە ئەمنیەکان بوەتەوە، بەڵام لاهور شێخ جەنگی لە وتارێکدا ڕایگەیاند"بەرنامەی تیرۆر بوەتە ئەجێندای یەکێتی نوێ، ڕۆژانە کادیرە سەربازی و سیاسیەکان دەستگیردەکات و تیرۆر دەکات."

لەبارەی لێکەوتنەوەی قوربانی لە کێشە نێوخۆییەکانی یەکێتی، پۆڵا تاڵەبانی وتی"بەیاننامەکەی ئەنجومەنی ئاسایش ڕونبو، بڕیاڕی دەستگیرکردنی هەبوەو خۆی ڕادەست نەکردوە، لەئەنجامدا ئەو دۆخە ڕویداوە."

زۆرترین بینراو
© 2022 Awene Online, Inc. All Rights Reserved.
×