‎"پارتی‌ سزای سیاسی‌و ئابوری سلێمانی ده‌دات، تەنها لەبەرئەوەی خەڵكەكەی پارتیان قبوڵ نیە"
  2021-11-30       824       
به‌وته‌ی‌ په‌رله‌مانتارێكی‌ یه‌كێتی‌، ‎"پارتی‌ سزای سیاسی‌و ئابوری سلێمانی ده‌دات، تەنها لەبەرئەوەی خەڵكەكەی پارتیان قبوڵ نیە". ئاماژه‌ بۆ ئه‌وه‌ش ده‌كات كه‌ ‎"ئەم حكومەت فێری ڕاوو ڕوت بووە، بەتەنها كۆمپانیاكانی پارتی مانگانە بەقەد نیوەی هاوڵاتیانی هەرێم پارەیان دەست دەكەوێت لەداهاتی نەوت كە نزیكەی ٣٠٠ ملیار دینارە جگە لەوپارەیەی لەقاچاخچێتی لەخاڵە سنورییەكانی حاجی ئۆمەران‌و ئیبراهیم خەلیل‌و دەروازەی وەلید دەستیان دەكەوێت‌و بەڕۆژی ڕووناك دەیخۆن."

ئاوێنه‌: له‌نوسینێكدا سەرکۆ ئازاد گەڵاڵی، ئه‌ندامی‌ په‌رله‌مانی‌ كوردستان له‌فراكسیۆنی‌ یه‌كێتی‌ هیِرشی‌ توند ده‌كاته‌ سه‌ر حكومه‌تی‌ هه‌رێم‌و پارتی‌ دیموكراتی‌ كوردستان‌و ده‌ڵێت، "تۆ بڵێی تاوانی سلێمانی چی بێت؟ یان دەتانەوێت سزای سیاسی و ئابوری سلێمانی بدەن تەنها لەبەر ئەوەی خەڵكەكەی پارتیان قبوڵ نیە؟ بەڕاست كێ قاچاخچێتی دەكات و پارەوقوتی فەرمانبەران و هاوڵاتیانی بەش مەینەتی ئەم ووڵاتە دەخوات؟ بێزەحمەت پێم ناڵێن داهاتی حاجی ئۆمەران و ئیبراهیم خەلیل دەروازەی وەلید چەندەو دەچێتە گیرفانی كێوە؟ پێم ناڵێن جاران نەوت بە كەمتر لە ٢٠ دۆلار بوو مانگانە ٣٥٠ ملیۆن دۆلار لە داهاتی نەوت دەچوە وەزارەتی دارایی ئەی ئێستا كە نەوت بە ٧٠ دۆلارە بۆ هەر ٣٥٠ ملیۆن دۆلار دەنێرن بۆ وەزارەتی دارایی، باقیاتەكەی كێ دەیخوات؟"


ده‌قی‌ نوسینه‌كه‌ی‌ سەرکۆ ئازاد گەڵاڵی: 


حكومەتی ھەولێر، سزای سلێمانی دەدات!

‎ئەم حكومەت فێری ڕاو ڕووت بووە، لە بیانو دەگەڕێت، بەتەنها كۆمپانیاكانی پارتی مانگانە بەقەد نیوەی هاوڵاتیانی هەرێم پارەیان دەست دەكەوێت لە داهاتی نەوت كە نزیكەی ٣٠٠ ملیار دینارە جگە لەوپارەیەی لە قاچاخچێتی لە خاڵە سنوریەكانی حاجی ئۆمەران و ئیبراهیم خەلیل و دەروازەی وەلید دەستیان دەكەوێت و بەڕۆژی ڕووناك دەیخۆن.

‎دەستی چەوری خۆتان بە سلێمانی مەسڕن، داهاتی زانكۆكانی سلێمانی مانگانە ٤ ملیار دینارە كە دەینێرن بۆ هەولێر بەڵام حكومەت مانگانە ملیارێكیان بۆدەنێرێتەوە، ئەم حكومەتە چەند ساڵە ئامادە نیە مانگایەك بكڕێت بۆ كۆلێژی ڤێتێرنەری سلێمانی و پارەی دەستەیەك سابونیان بۆسەرف ناكات وەك ئەوەی سلێمانی بەشێك نەبێت لە كوردستان.

‎ئێمە حەزدەكەین هەموو كوردستان ئاوەدان بێت بەس كەی ڕەوایە پارە هەبێت بۆ ڕێگای هەولێر دهۆك، تونێلی پیرمام سەری ڕەش، شەقامی ١٠٠ مەتری و ١٢٠ مەتری و ئێستاش ١٥٠ مەتری بەڵام پارەنەبێت بۆ چاكردنی ڕێگای كەلار سلێمانی، ڕانیە سلێمانی و شەقامی ١٠٠ مەتری؟ كە بەپێی ئامارە فەرمیەكان ڕۆژانە بەهۆی خراپی رێگاوبانەكانەوە دوو كەس گیان لەدەست دەدەن و زیاتر لە ١٣ كەس بەتەنها لە ڕۆژێكدا برینداردەبن كە ئۆباڵیان بە ئەستۆی سەرۆكی حكومەتە.

‎تۆ بڵێی تاوانی سلێمانی چی بێت؟ یان دەتانەوێت سزای سیاسی و ئابوری سلێمانی بدەن تەنها لەبەر ئەوەی خەڵكەكەی پارتیان قبوڵ نیە؟

‎بەڕاست كێ قاچاخچێتی دەكات و پارەوقوتی فەرمانبەران و هاوڵاتیانی بەش مەینەتی ئەم ووڵاتە دەخوات؟

‎بێزەحمەت پێم ناڵێن داهاتی حاجی ئۆمەران و ئیبراهیم خەلیل دەروازەی وەلید چەندەو دەچێتە گیرفانی كێوە؟

‎پێم ناڵێن جاران نەوت بە كەمتر لە ٢٠ دۆلار بوو مانگانە ٣٥٠ ملیۆن دۆلار لە داهاتی نەوت دەچوە وەزارەتی دارایی ئەی ئێستا كە نەوت بە ٧٠ دۆلارە بۆ هەر ٣٥٠ ملیۆن دۆلار دەنێرن بۆ وەزارەتی دارایی، باقیاتەكەی كێ دەیخوات؟

‎پێم ناڵێن ئەو پارە زۆرەی كە دەمێنێتەوە لە موچە كە زیاترە لە ٣٠٠ ملیار دینار چی لێدەكەن؟ كەچی موچەكەشی بەجوانی لێ دابەش ناكان؟

‎بەڕاست پێم ناڵێن لەدوای ٢٠٠٦ و یەكگرتنەوەی هەردوو ئیدارە چەند كیلۆمەتر لە هەولێر قیرتاوكراوەو چەند جادەو پردو تونێل كراوە بۆ هەولێرو چەندیش بۆ سلێمانی ؟

‎پێم ناڵێن چەندە وەبەرهێنان كراوە لە بواری نەوتدا لە زۆنی زەرد و چەندیش لە زۆنی سەوز؟

‎حكومەتی هەرێم بەپێی ئەو داتایانەی خۆیان بڵاوی دەكەنەوە مانگانە ٤٣٠ هەزار بەرمیل نەوت دەفرۆشێت و ئەو داهاتەی دەگەڕێتەوە خەزێنەی حكومەت ٧٠٠ ملیار دینارە، داهاتی ناوخۆو خاڵە سنوریەكان ٣٠٠ ملیار دینار هاوكاری هاوپەیمانان ٢٠ ملیار، كەواتە حكومەت مانگانە بێ پارەكەی بەغدا كە ٢٠٠ ملیار دینارە، زیاتر لە یەك تریلۆن دینار داهاتیەتی و بۆ دابەشكردنی موچە پێویستی تەنها بە ٩٠٠ ملیار دینارە كەواتە حكومەت ئەگەر لە بیانو نەبێت ئەوا دەتوانێت هەموو مانگێك بێ پارەكەی بەغداش موچە بەتەواوی دابەش بكات و زیاتر لە ١٠٠ ملیار دیناریشی بۆ دەمێنێتەوە ئەگەر پارەكەی بەغداش بێت ئەوا ٣٠٠ ملیار دیناری زیادە و ئەگەر كۆی پارەی نەوتیش بەشەفافی بگەڕێتەوە خەزێنەی حكومەت ئەوا ٦٠٠ ملیار دیناری زیادە و ئەوكاتە حكومەت دەتوانێت مانگانە موچەو نیوێك سەرف بكات نەك هەفتەی موچەی وەزارەت و دەستەیەك بەجنگە خشكێ.

‎لەكۆتایدا دەڵێم ئەم ناحەقیە گەورەیەی لە خەڵكی كوردستان و بەتایبەت سلێمانی ئازیز دەیكەن ڕەنگە چیتر بڕ نەكات و چیتر یەكێتی و خەڵكی سلێمانی ئەم سەبری ئەیوبەیان نەمێنێت.

سەرکۆ ئازاد گەڵاڵی
زۆرترین بینراو
© 2024 Awene Online, Inc. All Rights Reserved.
×