وادەی شەپۆلێکی بەفر و باران لە هەرێم ڕاگەیەنرا
  2021-12-07       882       
بەگوێرەی سەرچاوە کەشناسییەکان، لە سبەینێ چوارشەممەوە تاوەکو هەینی شەپۆلێکی بەفر و باران بارین زۆرینەی ناوچەکانی هەرێم دەگرێتەوە و پلەکانی گەرمیش دادەبەزن.

ئاوێنە: لە ڕاگەیەنراوێکدا ئاراس جەبار، شارەزای کەشناسیی هەرێم ڕایگەیاند، سبەی چوارشەممە، لە ئەنجامی درێژبوونەوەی کاریگەری نزمەپاڵەپەستۆیەکی مامناوەندی دەریای ناوەراست ئاسمانی ھەرێم بەزۆری دەگۆرێت بۆ نیمچە ھەور و خێرایی با لە زۆربەی ناوچەکاندا لە ئاراستەی باشوری رۆژھەڵاتەوە زیاد دەکات بەخێرایی ٢٠ تا ٤٠کم/س.

ئاماژەی بەوەشکردووە، "لەکاتەکانی ئێوارەدا شەپۆلێکی پچر پچر و مامناوەندی بارانبارین سەرەتا لە ناوچە شاخاوییەکانی سنوری پارێزگای دھۆک و ھەولێرەوە دەستپێدەکات و لەکاتەکانی شەودا بۆ بەرەبەیانی رۆژی پێنجشەممە کاریگەری زیاتر دەبێت و درێژ دەبێتەوە بۆ ناوچەکانی سنوری ئیدارەی راپەرین و سنوری پارێزگای سلێمانی و ھەڵەبجە و بەکاریگەرییەکی لاوازیش سنوری پارێزگای کەرکوک و ئیدارەی گەرمیان دەگرێتەوە."

ئەوەشی خستووەتەڕوو، " لە ئەنجامی کاریگەری بارستە ھەوایەکی ساردیش پلەکانی گەرما بەرێژەی ٤ تا ٦ پلەی سیلیزی نزمدەبنەوە و شەپۆلێکی بەفر بارین لەکاتەکانی شەودا ناوچە شاخاوییە سنورییەکان دەگرێتەوە."

بەگوێرەی پێشبینییەکانی ئەو کەشناسە، " زۆرترین رێژەی باران لەماوەی کاریگەری ئەم شەپۆلەدا پێشبینی دەکرێت لە ناوچە شاخاوییەکانی پارێزگای ھەولێر و ئیدارەی راپەریندا ببارێت."
زۆرترین بینراو
© 2022 Awene Online, Inc. All Rights Reserved.
×