موسلیم عەبدوڵڵا ئەندامی پەرلەمانی كوردستان لەوەڵامی لێدوانەكەی وەزیری دارایی عیراق سەبارەت بە نەمانی خواست لەسەر نەوت لەماوەی 10 ساڵی داهاتوودا ئاماژەی بەوەداوە، نابێت هاوڵاتیان بەرپرسیارێتی هەڵەكانی حكومەتە یەك لەدوای یەكەكان بكەوێتە سەرشانیان.
موسلیم عەبدوڵڵا لە لێدوانێكی رۆژنامەوانیدا لە وەڵامی ئەوەی عەلی عەللاوی وەزیری دارایی عیراق وتبوی "دوای 10 ساڵی تر نەوت دەڕوخێت و حكومەتی عیراق ناچار دەبێت دەستبەرداری بەشێكی زۆر لە فەرمانبەرانی ببێت" وتویەتی، هەڵەی فەرمانبەران نییە گەندەڵی لە دەسەڵاتدا هەیە، بەڵكو بۆ نەبونی هیچ پلانێك لەلایەن حكومەتەوە دەگەڕێتەوە.
باسی لەوەش كردووە، چەند ساڵێكە هەموو جیهان دەڵێن داواكاری نەوت دەكەوێتە ئاستێكی نزمەوە، بۆیە دەبێت بە پشتبەستن بە داهاتی نوێ وەك پیشەسازی و كشتوكاڵ و كەرتەكانی دیكە ئامادەكاری بۆ قۆناغی داهاتوو بكەین.
پێشتر عەلی عەللاوی وەزیری دارایی عیراق ئاماژەی بەوەدابوو، بەهۆی ئەوەی جیهان بەرەو ئۆتۆمبێل و ئامڕازی گواستنەوەی كارەبایی دەڕوات، لەماوەی 10 ساڵدا نرخی نەوت داڕوخان بەخۆیەوە دەبینێت و ئەمەش كاریگەری راستەوخۆ لەسەر عیراق دروست دەكات و دەبێتە هۆی ئەوەی حكومەت دەستبەرداری بەشێك لە فەرمانبەرەكانی ببێت.