شانەی راگەیاندنی ئەمنی عێراق رایگەیاند، لەئەنجامی هێرشە موشەكییەكەی ئێوارەی ئەمڕۆ پێنجشەممە بۆ سەر ناوچەی سەوز، كچێكی منداڵ و ژنێك برینداربون.
ئاوێنە: شانەی راگەیاندنی ئەمنی عێراق لە بەیاننامەیەكدا ئاشكرایكردوە "لە هێرشێكی تیرۆریستی ترسنۆكانەدا، دانیشتوانی بێتاوانی ناوچەی سەوزی بەغداو بارەگاكانی نێردە دیپلۆماتییەكان كە بەرپرسیارێتی پاراستنیان لەئەستۆی هێزە عێراقییەكانە، بە ژمارەیەك موشەك كرانە ئامانج."
ئەوەشی خسۆتەڕو، موشەكەكان لە ناوچەی دۆرە لە باشوری بەغداوە هاوێژراون و لە ئاكامی هێرشەكەدا كچێكی منداڵ و ژنێك برینداربون.
ئاشكراشیكردوە كە یەكێك لە موشەكەكان لەنێو قوتابخانەی "ئیلاف" لەنێو ناوچەی سەوز كەوتۆتە خوارەوەو هێزە ئەمنییەكانیش لێكۆڵینەوە دەكەن بۆ زانینی زیانەكان.