شانەی راگەیاندنی ئەمنی عێراق، ئەمڕۆ شەممە، رایگەیاند، هەوڵێكی هێرشكردنە سەر بنكەی ئاسمانی بەلەد لە پارێزگای سەڵاحەدین پوچەڵكرایەوە.
ئاوێنە: شانەی راگەیاندنی ئەمنی عێراق، لە بەیاننامەیەكدا رایگەیاندوە، بەرەبەیانی ئەمڕۆ شەممە، سێ فڕۆكەی بێفڕۆكەوان نزیكبونەتەوە لە باشوری بنكەی ئاسمانی بەلەد لە پارێزگای سەڵاحەدین.
ئاماژەی بەوەشداوە كە فڕۆكەكان لەلایەن هێزی پاراستنی بورجە دەرەكییەكانی بنكەكەوە بینراون و دڵنیابونەتەوە كە فڕۆكەی نەیارن.
بەگوێرەی بەیاننامەكە هێزەكە تەقەی لە فڕۆكەكان كردوەو فڕۆكەكان ناچار هەڵاتون.
بەر لە بەیاننامەكەی شانەی راگەیاندنی ئەمنی، میدیا عێراقییەكان بڵاویان كردبوەوە كە بە فڕۆكەی بێفڕۆكەوان هێرشكراوەتە سەر بنكەی ئاسمانی بەلەدو فڕۆكە بێفڕۆكەوانەكە بەنزمی فڕیوەو بنكەكەی کردوەتە ئامانج و بەهۆیەوە ئاگر لە نێو بنکە سەربازییەکە دروستبوە و شوێنەکە دوکەڵی لێ بەرزبوەتەوە.