ژمارەی ئەو کەسانەی لە یانە شەوانەکانی هەولێر دەستگیرکراون ئاشکرا کرا
  2022-01-18       920       


قائیمقامی قەزای ناوەندی هەولێر ڕایگەیاند، لە هەڵمەتی داخستنی یانە شەوانەکاندا، تا ئێستا نزیكەی 200 كەس دەستگیركراون و 11 شوێنیش داخراون، دەشڵێت، پێویستە لە ڕووی ئاسایشی و تەندروستییەوە ئەو شوێنانە لە ژێر كۆنتڕۆڵدا بن و خەڵك بتوانێت ڕووی تێ بكات.  

ئاوێنه‌: نەبەز عەبدولحەمید، قایمقامی قەزای ناوەندی هەولێر (سێشەممە 18-1-2022) لەبارەی هەڵمەتی داخستنی یانە شەوانەکانی هەولێرەوە بە "دەنگی ئەمەریکای ڕاگەیاند، " لە هەڵمەتی داخستنی یانە شەوانەکاندا، تا ئێستا نزیكەی 200 كەس دەستگیركراون و 11 شوێنیش داخراون، ئەوانەی كە دەستگیركراون لە بنكەكانی پۆلیس پەڕاویان بۆ دەكرێتەوە و ئەو شوێنانەشی كە داخراون بەپێی یاسا مامەڵەیان لەگەڵدا دەكرێت."  

ئاماژەی بەوەشکردووە، "ئەوەی كە ڕوویداوە هیچ پەیوەندییەكی بە كەرتی گەشتوگوزارەوە نییە زۆر كەس وا لێكدەداتەوە كە زیان بە گەشتوگوزار دەگەیەنێت، بە پێچەوانەوە ئەگەر ئەوە هەبێت زیان بە كەرتی گەشتوگوزار دەگات ئەمانە شوێنی ڕێگەپێدراو نەبوون و كاری نەشیاوی تێدا ئەنجامدراوە، شوێنێك بوون كەوا سەرپێچی ڕێنماییەكانیان كردووە، ئەو شوێنانە هەمووی دەبێت رێكبخرێنەوە بەپێی ئەو بڕیارانە كار بكەن كە لە پارێزگاوە دەرچووە لە ڕووی پابەندبوون بەكات، هیچ شوێنێك لە جیهاندا نییە كە تاوەكو بەرەبەیان كراوە بێت، پێویستە لە ڕووی ئاسایشی و تەندروستیشەوە ئەو شوێنانە لە ژێر كۆنتڕۆڵدا بن و خەڵك بتوانێت ڕووی تێ بكات، بۆیە ئەمە لە چوارچێوەی ئەو پلان و بەرنامەی پارێزگا دێت كە مەبەست لێی رێكخستنەوەی ئەو شوێنانەیە."  

ئەوەشی خستووەتەڕوو، "سیكتەری گەشتوگوزار یەكێك لە سیكتەرە گرنگەكانە، كابینەی نوێی حكومەتی هەرێمی كوردستانیش گرنگیەكی تایبەتی پێ دەدات ئێمە هەردەم هەموو لایەنەكانی ئیداری لە هەولێر هەوڵ دەدەین كەوا زیاترین گەشتیار ڕابكێشین بۆ هەولێر و هەروەها پەرە بە شوێنە گەشتیارییەكان بدرێت و فراوان بكرێن."  

زۆرترین بینراو
© 2022 Awene Online, Inc. All Rights Reserved.
×