2022-01-21   348     
مستەفا کازمی، سەرۆک وەزیرانی عێراق و مەسرور بارزانی، سەرۆکی حکومەتی هەرێمی کوردستان پەیوەندییەکی تەلەفۆنیان ئەنجامدا و رایانگەیاند، جەخت دەکەنەوە لەسەر چڕکردنەوە و برەودانی زیاتر بە هاریکاریی و هەماهەنگیی، بۆ ڕوبەڕوبونەوەی هەڕەشە و مەترسییەکانی داعش.
نوسینگەی راگەیاندنی مەسرور بارزانی بڵاویکردەوە، ئێوارەی ئەمڕۆ هەینی مەسرور بارزانی سەرۆکی حکومەتی هەرێمی کوردستان، لە پەیوەندییەکی تەلەفۆنیدا لە گەڵ مستەفا کازمی سەرۆک وەزیرانی فیدرال ، بە "توندی هێرشی تیرۆریستی چەکدارانی داعشی بۆ سەر سوپای عێراق لە پارێزگای دیالە سەرکۆنە کرد".
ئەوەش هاتوە، "لە پەیوەندییەکەدا، سەرۆکی حکومەت وێڕای شەرمەزارکردنی پەلامارە تیرۆریستییەکە، پرسە و هاوخەمی خۆشی بۆ شەهیدبونی 11 سەربازی عێراقی کە لە ئەنجامی هێرشەکەی تیرۆریستانی داعش شەهید بون، بە سەرۆک وەزیرانی فیدراڵ گەیاند".
لە پەیوەندییە تەلەفۆنییەکەدا سەرۆکی حکومەتی هەرێمی کوردستان و سەرۆک وەزیرانی عێراق هاوڕابون "لەسەر چڕکردنەوە و برەودانی زیاتر بە هاریکاریی و هەماهەنگیی، بۆ ڕوبەڕوبونەوەی هەڕەشە و مەترسییەکانی تیرۆریستانی داعش".