هەسەدە ئاماری شەڕی حەسەكەی بڵاوكردەوە: 175 داعش كوژراون
  2022-01-23       1038       

فەرماندەیی گشتیی هەسەدە، ڕایگەیاند، لەماوەی سێ رۆژی رابردوی شەڕی حەسەكەدا دژبە چەكدارانی داعش لەدوای هێرشەكەیان بۆ سەر زیندانی غوێران، لانیكەم 175 چەكداری کوژراون و هەروەها 27 شەڕڤانیش شەهید بون.

ئاوێنە: فەرماندەیی گشتی هێزەکانی سوریای دیموکرات (هەسەدە)، ئەمڕۆ یەكشەممە، لە بەیاننامەیەکدا لەبارەی هێرشی چەكدارانی داعش بۆ سەر زیندانەکەی گەڕەکی غوێرانی حەسەکە رایگەیاند"لەلایەن ڕای گشتییەوه زانراوه که هێرش و هەڕەشەکانی دەوڵەتی تورک بۆ سەر هەرێمەکانمان بەردەوامە، فڕۆکە بێ فڕۆکەوانەکانی دەوڵەتی تورک پێشتر 6 گەنجیان لە کۆبانێ شەهید کرد و پاشان هێرشەکانی دەوڵەتی تورک بۆ سەر هاوڵاتیان لە گوندەکانی عەین عیسا و زرگان و تیل تەمر زیادی کرد، هێزەکانمان بە شێوەیەکی کاریگەرانە لەبەرامبەرئەو هێرشانە بەرخۆدانیان کردوە، لە کاتێکدا هێزەکانمان لە بەرەکانی ناوچە داگیرکراوەکان بەرخۆدان دەکەن، چەتەکانی داعش هێرشێکی بەرفراوانیان کردە سەر زیندانی سەناعە لە حەسەکە ئەم زیندانە گەورەترین زیندانە لەو ناوچەیە کە چەتەکانی داعشی تێیدا بێت ئەم زیندانە تەنیا مەترسیدارترین زیندان نییە بۆ هەرێمەکانمان بەڵکو مەترسیدارە بۆ ئاسایشی هەمو جیهان."

ئاوێنە لە تەلەگرام جۆین بكە

هەسەدە ئاماژەی بەوەکردوە"بەپێی دانپێدانانی هەندێک لەچەتە هێرشبەرەکان کە دەستگیرکراون بەلایەنی کەمەوە 200 چەتەی خۆکوژ دەستیان هەبوە لەو هێرشانەدا کە هەندێکیان لەسەرێکانی و تەل عوبەیدو هەندێکیش لەعێراقەوە هاتون و لەگەڕەکی غوێران نیشتەجێ بون و ڕۆژی 20ی کانونی یەکەم لە دەوروبەری کاتژمێر 07:30 خولەکی ئێوارە، دوای شەش مانگ لە ئامادەکاری بە ئۆتۆمبێلی بۆمبڕێژکراوەوە هێرش کرایە سەر زیندانەکە، لەگەڵ ئەوەدا چەتەکانی زیندان هێرشیان کردە سەر ستافەکانی زیندان وەک تەندروستی و چێشتلێنان و ئاسایش و هەوڵی هەڵهاتنیاندا تا ئێستا هیچ زانیارییەکی ڕون لەبارەی چارەنوسی ئەو کارمەندانەوە بەدەست نەخراوە."

لە بەیاننامەکەدە هەسەدە وتوشیەتی"هەوڵدانی چەتەکان بۆ هەڵاتن سەرکەوتو نەبو، بەڵام هەندێک لە چەتەکان توانیان لە تەنیشت زیندانەوە بگەنە بینای فاکەڵتی ئیقتساد، هێزەکانمان دەوروبەری زیندان و ناوچەکەیان کۆنتڕۆڵ کرد، بەڵام شەڕی سەختی سەرەکی لەگەڵ ئەو شانانەی کە لە دەرەوە هێرشیان دەکردو شەڕیان کرد لە گەڕەکی غوێرانی شەرقی و لە گەڕەکی زهورو لە مەیدانی پانارۆما پێکدادانی سەخت ڕویدا و تا ئێستا زۆربەی ئەو شانە هێرشبەرانە تێکشکێنراون جارێکی تر لە گەڕەکی غوێران دەست بەسەر هەندێک لە پەناگەی نهێنی و چەکی قورسدا گیرا."

باسی لەوەشکردوە"لە ئەنجامدا ئێستا زیندانەکە لە ژێر دەستی هێزەکانماندایەو ڕێوشوێنی پێویست گیراوەتە بەرو هەوڵی هەڵاتنیان شکستی هێناوە لە لایەکی دیکەوە هێزەکانمان ئێستا کار دەکەن بۆ ئەوەی کۆنتڕۆڵی ناو زیندانەکە دابمەزرێننەوەو شەڕی ئێمە لە دژی خۆکوژی چەتەکانی داعش کە هێرشیان کردە سەر زیندانەکە بەردەوامە لەم 2-3 ڕۆژەدا زیاتر لە 160 چەتەی هێرشبەرو 15 چەتە کە ویستویانە لە زیندان ڕابکەن و لەگەڵ هێزەکانماندا پێکدادانیان ئەنجامدا کوژران کۆی گشتی 175 چەتە کوژران.

لە بارەی زیانی هێزەکانیان ئاشکرای کردوە “لەم 3 ڕۆژەدا 27 شەڕڤانمان قارەمانانە شەهید بون ئێستا دۆخەکە لەژێر کۆنتڕۆڵدایە و ئۆپەراسیۆنێکی بەرفراوانی پاککردنەوەمان دەستپێکردوە، بە بەشداری 10 هەزار شەڕڤانی هەسەدە و هێزەکانی ئاسایشی ناوخۆ هەڵمەتێکی پاککردنەوەی دژی داعش دەستپێدەکەین ئۆپەراسیۆنێکی بەرفراوان لە ناوچەکانی حەسەکە و ڕەقە و دێرەزۆر لە دژی شانە نهێنییەکانی داعش."

ئەوەشی خستۆتەڕو"هەندێک هێرش بۆ سەر شانەکانی داعش هەیە کە هێزەکانمان هێشتا بەردەوامن و بۆ ئەو مەبەستەش خواستی ئێمە یارمەتیدانی گەلەکەمانە لە حەسەکە و هەمو هاوڵاتیانمان لەگەڵ هێزە ئەمنییەکاندا هێزەکانمان ئێستا زۆر بە وریاییەوە کار دەکەن بۆ ئەوەی زیان بە هاوڵاتیان نەگەیەنن چونکە چەتەکان لەناو هاوڵاتیانی غوێران خۆیان حەشارداوە."

ئاشکراشی کردوە “بەپێی لێدوانی هەندێک لەو دەستگیرکراوانەی داعش بەرپرسەکانیان لای تورکیان و لەناوچە داگیرکراوەکانی وەک سەرێکانی."

ئەوەشی وتوە"هەندێکی دیکە لە چەتەکان لە ڕومادی عێراقەوە هاتون و جێی سەرنجە لە کاتێکدا هێزەکانمان لەگەڵ داعشدا مامەڵەیان دەکردو هێزەکانی سوپای تورکی داگیرکەرو چەتەکانیان هێرشیان کردە سەر بنکەو پێگەکانی هێزەکانمان لەسەر هێڵی عەین عیسا و بوە هۆی شەهیدبونی سێ شەڕڤان هەروەها گردبونەوە و هێرش بۆ سەر هێڵی تەل تەمر و ئەبوڕەسین هەیە هاوکات ئەم هێرشانە و هێرشەکانی داعش پێکەوە مانادارن بەڵام وەک هێزەکانی هەسەدە لە ئێستاوە بە فیداکارییەکی گەورە لە دژی هەمو شێوەکانی هێرشەکان هەرێم و گەلی خۆمان دەپارێزین."

زۆرترین بینراو
© 2022 Awene Online, Inc. All Rights Reserved.
×