''بەهۆی دۆسییەکانی پێشوتریانەوە چەندین کاندیدی پۆستى سەرۆک کۆمار دوردەخرێنەوە''
  2022-01-25       643       


پسپۆڕێکی بواری یاسایی عێراقیی دەڵێت، "چەندین لایەنی حکومیی وردبینی لەدۆسیەی ئەوکەسانەدا دەکەن کە خۆیان بۆ پۆستی سەرۆکایەتیی کۆمار پاڵاوتوە"، هەروەک پێشبینیشیکردوە، بەشێک لەو کاندیدانە بەهۆی دۆسییەکانی پێشوتریانەوە دوربخرێنەوە.

عەلی تەمیمی پسپۆڕی یاسایی لەلێدوانێکی ڕۆژنامەوانیدا وتویەتی:"هەموو ئەوکەسانەی خۆیان بۆ پۆستی سەرۆکایەتیی کۆمار پاڵاوتوە لەلایەن چەندین لایەنی حکومیی تایبەتمەندەوە وەک "(دەستەی دەستپاکیی، لایەنە دادوەرییەکان، وەزارەتی ناوخۆ، دەستەی لێپرسینەوەو دادپەروەریی) وردبینی لەدۆسییەکانیان دەکرێت‌و (ڕەفتارو دۆسیەکانی پێشوتریان) بەدواداچونی بۆدەکرێت".

هەروەک وتویەتی:"هەر کاندیدێک لەلایەن ئەو دەزگایانەوە تێبینی لەسەر دۆسیەکەی هەبێت، ئەوە لەکاندیدبونی بۆ پۆستی سەرۆکایەتیی کۆمار دوردەخرێتەوە".

تەمیمی ئاماژەی بەوەشکردوە، لەهەموو خولێکی نوێدا، ژمارەیەکی زۆر لەکاندیدەکان بەهۆی بونی تێبینی لەسەر ژیاننامەو دۆسیەی پێشوتریانەوە لەلایەن هەندێک لەو دەزگا چاودێرییانەوە دورخراونەتەوە، هەربۆیە بەدڵنیایی لەم خولەشدا بەشێک لەو کاندیدانە دوردەخرێنەوە، بەتایبەت دوای گەیشتنی ڕاپۆرتی پێویست لەسەر دۆسیەی ئەوکەسانە کە خۆیان کاندیدکردوە.

زۆرترین بینراو
© 2022 Awene Online, Inc. All Rights Reserved.
×