بهوتهی سەرکردەیهكی هاوپەیمانی فەتح، هادی عامری، سەرۆکی هاوپەیمانێتییهكه لەهەوڵەکانی بەردەوامە بۆ نزیكردنهوهی سهدرو سهركردهكانی چوارچێوەی هەماهەنگی بۆ ئەوەی پێش کۆبونەوەی ئەنجومەنی نوێنەرانی عێراق بگەنە رێککەوتن.
ئاوێنه: رەفیق ساڵحی، سەرکردە لەهاوپەیمانی فەتح، لە لێدوانێکی رۆژنامەوانیدا ڕایگهیاند، چوارچێوەی هەماهەنگی بەردەوامە لەپەیوەندییەکانی لەگەڵ رەوتی سەدر، بۆ ئەوەی بەر لەکۆبونەوەی داهاتوی ئەنجومەنی نوێنەرانی عێراق بگەنە ئەنجامو ماڵی شیعە بەیەکگرتوویی بهێڵنەوە.
وتیشی، "لایەنەکان دەربارەی مافەکانی پێکهاتەی شیعەو پڕۆسەی سیاسی هاودیدن، هەربۆیە پەیوەندییەکانی عامری لەگەڵ سەدر بەشێوەیەکی رێکخراو بەڕێوەدەچێت، لەپێناو کۆتاییهێنان بەناکۆکییەکانی نێوان چوارچێوەی هەماهەنگیو رەوتی سەدر".
دوای چەندین کۆبونەوەیەکی نێوان موقتەدا سەدر، ڕێبهری ڕهوتی سهدرو سەرکردەکانی چوارچێوەی هەماهەنگی، تائێستا نەگەیشتونەتە هیچ رێککەوتنێک، سەدریش جەخت لەپێکهێنانی حکومەتی زۆینەی نیشتمانی دەکاتەوە.
لهلایهكی دیكهوه عالیە نسەیف، ئەندامی فراکسیۆنی دەوڵەتی یاسا لەپەرلەمانی عێراق لهلێدوانێكی ڕۆژنامهوانیدا ڕایگهیاند، پڕۆژەیەکیان بەمەبەستی چۆنیەتی دیاریکردنی سەرۆک وەزیران و پێکهێنانی حکومەت بۆ گفتوگۆ لەگەڵ رەوتی سەدر ئامادەکردوە، چونکە باوەڕیانوایە پۆستی سەرۆک وەزیران مافی هەمو پێکهاتەی شیعەیە نەک بەشێکی ئەو پێکهاتەیە.
وتیشی، لەپڕۆژەکەیاندا داوایانکردوە سەرۆک وەزیران کۆدەنگی شیعەی لەسەر بێت وەک چۆن پێکهاتەکانی دیکە بەکۆدەنگی پۆستە باڵاکان دیاری دەکەن، داواکاری دوەمیشیان ئەوەیە سەرۆک وەزیران بەگوێرەی بەرکەوتەی هەڵبژاردن وەزارەتەکان بەسەر لایەنەکاندا دابەشبکات.
ئاماژەی بەوەشکردوە، بەگرنگی دەزانن هەمو لایەنەکانی شیعە بەشداربن لەدیاریکردنی سەرۆکی حکومەتی نوێدا، چونکە باوەڕیانوایە پۆستی سەرۆک وەزیران مافی هەمو پێکهاتەی شیعەیە نەک بەشێکی ئەو پێکهاتەیە.