لە ساڵی (2003)وە تائیستا لە عێراق، زیاتر لە( 74 )دادوەر کوژراون و دەیان هەوڵی کوشتنیش پوچەڵ کراونەتەوە.
میدیا عەرەبییەکان، بڵاویانکردەوە؛ دۆخی دادوەریی و دادوەران لە عێراق لە دوای روخاندنی رژێمی بەعسەوە لە ساڵی(2003)، بەردەوام لەبەردەم هەڕەشە و مەترسیدابوە.
ئاماژەیان بەوەش کردوە، لە ساڵی(2003) وە لە عێراق، (74 )دادوەر کوژراون کە دواهەمینیان دادوەر، (ئەحمەد فەیسەڵ ساعدییە) کە رۆژی پێنجی ئەم مانگە لە پارێزگای میسان، کوژرا.
میدیاکان باسیان لەوەشکردوە، هەر لەو ماوەیەدا، دەیان هەوڵی کوشتنی دادوەر و لێکۆڵەرەوانی یاسایی لە عێراق، پوچەڵ کراونەتەوە.
گەرچی شارەزایانی دۆخی ئاسایشی عێراق، دادوەر و لێکۆڵەرەوانی وڵاتەکەیان بە ئازا وەسف کردوە لەبەردەم هەڕەشەی گروپە مافیایی و تاوانکاریەکان و بۆ میدیاکان وتویانە، هەڵوێست و قوربانیدانی دادوەران نەبوایە بۆ رێگریکردن لە تاوانەکانی تیرۆر، گەندەڵی و مادەهۆشبەرەکان، دۆخی وڵات زۆر خراپتر دەبو.
هاوکات بەشێک چاودێران پێیان وایە، دابەشکاریی لە پۆستە دادوەرییەکان لەنێوان حزبەکان و دەستوەردانی گروپە دەسەڵاتدارەکان لە دادگاکان، دەسەڵاتی دادوەریی لە عێراق بێبەها کردوە و بەوهۆیەشەوە نەتوانراوە تاوانبارانی دەیان دۆسیە بدرێنە دادگا ویاسا سەروەربێت.