عەلی شەداد پەرلەمانتاری چوارچێوەی هەماهەنگی لە پەرلەمانی عیراق داوا دەكات، مەسرور بارزانی سەرۆكی حكومەتی هەرێم بانگهێشتی بەغدا بكرێت و سەرجەم پارەی نەوت لە هەرێمی كوردستان بسەندرێت.
ئاوێنە: عەلی شەداد لە گفتوگۆیكی تەلەفزیۆنیدا وتویەتی، بڕیاری دادگای فیدراڵی یەكلاكەرەوەیە و ئەوانەی ناڕازین پێویستە پشت بە رێگە دەستورییەكان ببەستن، حكومەتی هەرێمی كوردستان ماددە دەستورییەكانی پێشێل كردووە.
وتوشیەتی، حكومەتی كوردستان گرێبەستی لەگەڵ كۆمپانیا جیهانیەكاندا كردووە بۆ بەرهەمهێنان و هەناردەی نەوت بەبێ گەڕانەوە بۆ حكومەتی فیدراڵی، زەرەرمەندی گەورە لەو سیاسەتەی كوردستان پارێزگای بەسرەیە.
ئەو پەرلەمانتارە داواش دەكات، مەسرور بارزانی سەرۆكی حكومەتی هەرێم بانگهێشتی بەغدا بكرێت و سەرجەم داهاتی نەوت لە هەرێم بسەندرێت، جەختی لەوەش كردووەتەوە كە پەرلەمانی عیراق رۆڵی گەورە دەبینێت لە جێبەجێ كردنی بڕیارەكەی دادگای فیدراڵی.