ئەحمەد روبێعی، ئەندامی پەرلەمانی عێراق، ئەمڕۆ هەینی رایگەیاند، جوڵەیەكی پەرلەمانی هەیە بە ئاڕاستەی پشتیوانیكردن لە دابەزاندنی نرخی دۆلارو زۆربەی پەرلەمانتارانیش لەگەڵ ئەو جوڵەیەدان.
ئاوێنە: ئەحمەد روبێعی، ئەمڕۆ هەینی بە ئاژانسی هەواڵی عێراقی وتوە، ئاڕاستەیەكی جدی هەیە لەلای زۆربەی پەرلەمانتاران بۆ كەمكردنەوەی نرخی دۆلار ئەوەش لەدوای بەرزبونەوەی نرخی نەوت.
ئاوێنە لە تەلەگرام جۆین بكە
ئەوەشی خستۆتەڕو، بەرزكردنەوەی نرخی دۆلار كاریگەرییەكی زۆری لەسەر كاروبارەكان بەتایبەت لەسەر چینی هەژاران هەبوە.
ئەحمەد روبێعی ئومێدی بەوەش هەیە لایەنە سیاسییەكان پشتیوانی بڕیارێك بكەن بۆ دابەزاندنی نرخی دۆلار كە بۆتە داوایەكی جەماوەری و پەرلەمانتارانیش لەگەڵ ئەو ئاڕاستەیەدان.
ئەوەش لەكاتێكدایە دوێنێ موقتەدا سەدر، رابەری رەوتی سەدر، شەش پێشنیاری لەبارەی نرخی دۆلارەوە خستەڕو كە یەكێكیان بریتی لە بانگهێشتكردنی دەستبەجێی وەزیری دارایی و پارێزگاری بانكی ناوەندی بۆ پەرلەمان.
دوابەدوای ئەوەش سەرۆكایەتی پەرلەمانی عێراق وەزیری دارایی و پارێزگاری بانكی ناوەندی بانگهێشت كردو بەپێی بەیاننامەیەكی فەرمانگەی راگەیاندنی پەرلەمانی عێراق، بڕیارە سبەی شەممە، بە سەرۆكایەتی حاكم زاملی، جێگری یەكەمی سەرۆكی پەرلەمان كۆبونەوەیەك لە پەرلەمان بە ئامادەبونی وەزیری دارایی و پارێزگاری بانكی ناوەندی بەڕێوەبچێت بۆ گفتوگۆكردن لەبارەی نرخی دۆلار.