پێشنیوەڕۆی ئەمڕۆ شەممە، كۆبونەوەی سەرۆكایەتی پەرلەمانی عێراق بە ئامادەبونی پارێزگاری بانكی ناوەندی و جێگرەكەی، بۆ تاوتوێكردنی نرخی دۆلار دەستی پێكرد.
ئاوێنە: كۆبونەوەكە، دوای ئەوە دێت كە رۆژی پێنجشەممە، لەسەر داوای موقتەدا سەدر، رابەری رەوتی سەدر، سەرۆكایەتی پەرلەمانی عێراق، بانگهێشتی وەزیری دارایی و پارێزگاری بانكی ناوەندی عێراقی كرد بۆ ئامادەبون لە پەرلەمان بەمەبەستی گفتوگۆكردن لەسەر نرخی دۆلار.
بەڵام عەلی عەلاوی، وەزیری دارایی عێراق رەتیكردەوە بەدەم داواكەی سەرۆكایەتی پەرلەمانی عێراقەوە بچێت و ئامادەی كۆبونەوە بێت بۆ تاوتوێكردنی نرخی فرۆشتنی دۆلار.
عەلی عەلاوی، وەزیری دارایی عێراق لە نوسراوێکدا کە بۆ مستەفا کازمی، سەرۆک وەزیرانی عێراقی ناردوە؛ رایگەیاند: "لەلایەن جێگری سەرۆکی ئەنجومەنی نوێنەرانەوە بانگهێشتکرام بۆ ئەوەی رۆژی شەممە ئامادەبم بۆ تاوتوێکردنی نرخی فرۆشتنی دۆلار، ئەوەش رێک دوای تویتێکی سەید موقتەدا سەدر هات کە تێیدا داوای لێکردم بچمە ئەنجومەنی نوێنەران بۆ تاوتوێکردنی نرخی فرۆشتنی دۆلار؛ بۆیە دیارە کە بانگهێشتکردنم لەلایەن جێگری سەرۆکی ئەنجومەنی نوێنەران بەهۆی تویتەکەی سەید موقتەدا، رێبەری رەوتی سەدرەوەیە، کە هیچکات ئامادە نیم بچمە ژێر باری."